Ж.Энхбаяр: Ц.Нямдорж сайдыг ч юмуу Н.Алтанхуягийг огцруулах тухай яагаад оруулж ирээгүй юм
МАН-ын Удирдах зөвлөл өчигдөр хуралдаж Эрдэс баялаг, эрчим хүчний сайд Д.Зоригтыг огцруулах эсэх асуудлыг хэлэлцсэн юм. Тэд Д.Зоригт сайдыг авч үлдэхээр шийдсэн байна. Удирдах зөвлөлийн хурал тарсны дараа УИХ-ын гишүүн Ж.Энхбаяраас сэтгүүлчид тодруулга авсан юм.
-Ямар үндэслэлээр Д.Зоригт сайдыг огцруулах шаардлагагүй гэж Удирдах зөвлөл үзсэн юм бэ?
-Д.Зоригт сайдыг огцруулах үндэслэлүүдийн дотор Оюу толгой, Таван толгойн асуудал нэлээд чухал байсан. Оюу толгойн гэрээнд засч сайжруулах зүйл байгаа л байх. Гэхдээ гэрээ гэдэг хууль шиг хатуу зүйл биш учраас явцын дунд засч өөрчлөх боломжтой. Таван толгойн гол ажил одоо эхлээ ч үгүй хэрнээ маш их анхаарал татаж байна. Цаашид ч анхаарлын төвд байх нь ойлгомжтой. Үр дүнг нь үзээгүй байж салбарын сайдыг нь шахаж байна. Тийм юм бол Л.Гансүх, С.Баярцогт сайдын нэрийг яагаад оруулж ирээгүй юм. Үнэхээр огцруулъя, хариуцлага тооцъё гэж байгаа юм бол яагаад өөр хүмүүсийн нэрийг оруулж ирэхгүй байгаа юм бэ.
-Жишээ нь өөр хэн гэж?
-Заавал үүнийг нэр цохож хэлэх гэсэнгүй. Улс төрийн үүднээс тайлбарлахад жишээ нь Ц.Нямдорж сайдыг ч юмуу Н.Алтанхуягийг огцруулах тухай яагаад оруулж ирээгүй юм. Чадахгүй л байхгүй юу. 10 жилийн өмнө байгуулчих ёстой Оюу толгой гэрээг эхлүүлснийх нь төлөө, 40-50 жил хаягдаад байсан Таван толгойн ашиглалтыг эхлүүлснийх нь төлөө Д.Зоригт сайдыг оролдоод байгаа юм уу. Бид залуу хүнийг дэмжих талаас нь ажиллах ёстой. Мэдээж алдаа оноо гаргаж л таараа. Гэхдээ улс орны нэн тэргүүний чухал салбарыг хариуцаад явж байгаа хүнийг шахаж болохгүй. Тэгээд ч Д.Зоригт бол улс төрд харьцангуй шинэ хүн. Товчхондоо бол хамгаалах хүнгүй учраас ингэж байгаа гэж ойлгож ч болно. Удирдах зөвлөл энэ үүднээс нь хандсан.
-Түүнийг огцруулахгүй гэдэг саналыг Удирдах зөвлөлийн гишүүд 100 хувь дэмжсэн үү?
-100 хувь дэмжсэн. Улс орны хэмжээний бодлогын асуудал яригдаж байгаа учраас манай нам үүнд нэгдмэл байр суурьтай байна. Бид бодлогоо улам бэхжүүлье, хариуцсан салбарын сайдынхаа ажлыг сайжруулъя гэсэн шийдвэр гаргалаа. Үүнийгээ намын бүлэгтээ танилцуулна.
