Нийслэлийн Засаг дарга бөгөөд Улаанбаатар хотын Захирагч Э.Бат-Үүл нийтийн тээврийн “Ухаалаг Улаанбаатар” төслийг хэрэгжүүлэхээр шалгарсан “Дата Карт консерциум”-ын удирдлагуудтай  хамтын ажиллагааны санамж бичигт гарын үсэг зурлаа.

Монголын талаас Тор групп, Нама-Оч, Дата карт сервис, Жи-Мобайл, Худалдаа хөгжлийн банк, БНСУ-аас Zeus, Amola, Fores, KSCC компаниуд нэгдэж  “Дата Карт консерциум” –ыг байгуулсан бөгөөд “Ухаалаг автобус” төслийг хэрэгжүүлэх юм.

Тус төслийн хүрээнд Нийтийн тээврийн хяналт удирдлагын систем, Мэдээллэх систем, Автомат төлбөр хураалт гэсэн 3 дэд төслийг хэрэгжүүлнэ. Энэ нь нийтийн тээврийн автобусуудад  GPS  суурилуулж, хаана, хэдэн цагт, ямар маршрутаар явж байгаа талаар бүрэн мэдээллийг нэгдсэн төвөөс авах нөхцөл бүрдэнэ.

Ингэснээр автобусны чиглэл, маршрутыг эдийн засгийн үр ашигтай, оновчтой байдлаар төлөвлөх боломжтой болно. Мөн автомат төлбөр хураалтын системийг хэрэгжүүлсэнээр автобусны билетийг цахим карт болгож, тодорхой хугацаатайгаар цэнэглэн автобусаар үйлчлүүлэхдээ картаа уншуулан төлбөрөө төлдөг байх зарчимд шилжинэ.

Энэ үйлчилгээтэй холбоотойгоор цахим төлбөрийн картыг цэнэглэх, борлуулах цэгийг  автобусны буудлын ойролцоох хүнсний дэлгүүр, сонин борлуулах мухлаг зэрэгт байгуулах юм.

Төслийг хэрэгжүүлсэнээр автобусны жолооч нарт эвдрэл, саатал гарсан тохиолдолд товчлуур даран үйлчилгээний төв рүү мэдээлэл илгээх, бууж сууж байгаа болон доторхи бүх зорчигчдоо бүрэн хянах, хаалга онгойх, хаагдах мэдээлэл ирэх зэрэг давуу талтай.

Харин зорчигчдод автобус буудал дээр ирэх, хөдлөх цагийн бодит мэдээллээр хангагдаж, автобусан дотор чиглэл, буудлын нэрийг зарлах, цагийн хуваарь графикийн дагуу үйлчлүүлэх боломжийг бүрдүүлнэ. Төслийн хүрээнд нийтийн тээврийн үйлчилгээнд явж буй бүх автобус, автобусны буудлыг камержуулж орчин үеийн нийтийн тээврийн үйлчилгээг үзүүлэх нөхцөлөөр бүрэн хангана гэж төсөл хэрэгжүүлэгч тал онцолж байгаа юм.

Энэ төсөл хэрэгжсэнээр иргэд ухаалаг автобусаар үйлчлүүлэх боломж бүрдэнэ.

Энэ үеэр нийслэлийн Засаг дарга “Нийтийн тээврийн үйлчилгээгээр номер нэгд тооцогддог БНСУ-д нийтийн тээврийн шинэчлэлтийг хийсэн томоохон компаниуд энэ төсөлд оролцож байгаад таатай байна. Нийслэлийн хөгжлийг нийтийн тээврийн үйлчилгээгээр дүгнэж болно.

Энэ төсөл хэрэгжсэнээр иргэд ухаалаг автобусаар үйлчлүүлэх боломж бүрдэж, үнэлгээ нэмэгдэнэ гэдэгт итгэж байна” гэдгийг онцлон хэлсэн юм.

Төслийн санхүүжилтийг хэрэгжүүлэгч консерциум хариуцаж байгаа бөгөөд 2015 оны 04 дүгээр сараас иргэд цахим төлбөрийн картаар ухаалаг автобусаар үйлчлүүлнэ гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.