УИХ дахь МАН-ын бүлгээс АН-ын бүлгийн дарга Д.Эрдэнэбатад албан бичиг хүргүүлсэн байна.

Уг албан бичигт "УИХ-аас 2014 оны тавдугаар сарын 8-нд  “Эдийн засгийн идэвхжилийг нэмэгдүүлэх зарим арга хэмжээний тухай” 34 дүгээр тогтоолыг баталж, уг тогтоолоор дөрвөн бүлэг, 26 арга хэмжээг хэрэгжүүлэхийг Засгийн газарт даалгаснаар Засгийн газар 100 хоногийн хугацаанд эдийн засгаа сайжруулах арга хэмжээ авах үүрэг хүлээсэн.

УИХ-ын тогтоол батлагдсантай холбогдуулан “Эзэн-100” хөтөлбөрийн хүрээнд Засгийн газар нийт 70 чиглэлийн ажил хийж гүйцэтгэхээр ажилласнаас 18 чиглэлийн ажлыг хэрэгжүүлж, 16 чиглэлийн ажлыг  эхлүүлж амжсан бол Монгол Улсын эдийн засгийг 100 хоногт багтаан сэргээж, эрчимжүүлэхээр тавьсан  зорилтынхоо 62.6 хувийг огт хэрэгжүүлж чадаагүй.

Өөрөөр хэлбэл, Засгийн газар “Гэрийн даалгавар”-аа туйлын хангалтгүй биелүүлсэн. Энэ хугацаанд ханшийн өсөлт, инфляц, гадаадын хөрөнгө оруулалт, төсвийн алдагдал гэх мэт эдийн засгийн суурь үзүүлэлтүүд улам муудсан тул бид “Эзэн-100” хөтөлбөрөөс үр дүн гарсангүй хэмээн МАН-ын бүлэг дүгнэсэн. 

Ийнхүү МАН-аас АН-ын бүлэгт албан бичиг хүргүүлж, хариуцлага тооцох асуудлыг дахин сөхч байна. Та 2014 оны тавдугаар сарын 14-нд “Эдийн засагт эерэг дүн гарахгүй бол олонхи өөрсдөө Засгийн газартаа хариуцлага тооцно” хэмээн мэдэгдсэн. Ардчилсан Намын бүлэг хэлсэн үгэндээ хүрч, хариуцлага тооцох эсэхийг ард түмэн хүлээн сууна" хэмээжээ.