Дундговь аймгийн эрдэмтдийн "НУТГИЙН ХӨГЖИЛД ЭРДЭМТДИЙН ОРОЛЦОО" анхдугаар чуулган өнөөдөр 2025 оны 04 дүгээр сарын 04 өдөр Төрийн ордны Чингис хаан танхимд болж байна.

Анх удаа зохион байгуулж буй тус үйл ажиллагааны зорилго нь Дундговь аймгаас төрөн гарсан эрдэмтдийг нэгтгэн, эрдэм шинжилгээ, судалгааны ажлыг орон нутгийн онцлог, уур амьсгал, газар нутаг, хүн амын эрүүл мэнд, сурч хөгжих боломжид чиглүүлэн үр дүнг орон нутгийн удирдлагуудтай хамтран шинжлэх ухааны үндэслэлтэй хэрэгжүүлэх, бодит хөрсөнд буулган, нутаг орноо хөгжүүлэхэд оршиж байна.

УИХ-ын гишүүн Ц.Мөнхбат:

"Дундговь нутаг бол хэзээнээсээ эрдэмтэн,мэргэд ихтэй. Улс орны нийгэм, эдийн засгийн болон бусад хөгжилд өөр, өөрсдийн хувь нэмрээ оруулж ирсэн эрдэм, мэдлэгтэй хүмүүс ихтэй ийм аймаг. Өнөөдрийн чуулганы гол зорилго нь орон нутгийнхаа хөгжилд, эрдэмтдийнхээ оролцоог хэрхэн хангаж, хамтарч ажиллах талаар ярилцана. Цаашдаа орон нутагтаа энэ эрдэмтдийгээ урьж, хөгжлийн зарим нэг чухал асуудлууд дээр тэдний судалсан эрдэм, мэдлэгийг нэвтрүүлж, үр өгөөжтэй ажил өрнүүлэхийг зорьж байна."

“Талын гэгээ эрдэмтэд" ТББ-ын гүйцэтгэх захирал, МУБИС-ийн Дүрслэх урлаг, технологийн сургуулийн захирал, доктор (Ph.D) С.Батцоож:

"Дундговь аймгаас төрсөн эрдэмтдийнхээ эрдэм шинжилгээ, судалгааны бүтээлүүдийг Дундговь аймагтай хамтарч хэрэгжүүлэх, аймгийнхаа Засаг даргын мөрийн хөтөлбөрт тусгасан ажлууд дээр шинжлэх ухааны үндэслэлтэй ямар үйл ажиллагааг хэрэгжүүлэх боломжтой байна. Тэр дундаа ХАА, МАА, газар тариалан болон говь нутгийн хөрс, цаг уурт тохирсон ямар эрдэм шинжилгээ, судалгааны ажлуудын үр дүн гарсан байна.

Тэдгээрийг нутаг, орондоо хэрхэн хэрэгжүүлэх боломж байна энэ талаар нутгийн удирдлагуудтай ярилцаж, нэгдсэн ойлголтод хүрэх юм. Нөгөө талдаа эрдэмтэн судлаачдынхаа иргэдийнхээ боловсрол, эрүүл мэнд рүү чиглэсэн судалгааны ажлуудын үр дүнг орон нутагт нэвтрүүлэх, боловсон хүчнүүдээ чадавхжуулах, сургах тал дээр нутгийн удирдлагуудтай хэрхэн хамтран ажиллах талаар ярилцаж, санамж бичиг байгуулна."

“Талын гэгээ эрдэмтэд" ТББ-ын ТУЗ-ын дарга, Шинжлэх Ухааны Академийн Хэл зохиолын хүрээлэнгийн Утга зохиол судлалын салбарын эрдэм шинжилгээний тэргүүлэх ажилтан, доктор (Ph.D), дэд профессор Д. Болормаа:

"Дундговь аймгийн эрдэмтдийн хамтран байгуулсан “Талын гэгээ эрдэмтэд" ТББ нь Дундговь аймгийн харьяат эрдэмтэн судлаачдыг нэгтгэх, тэдгээрийн эрдэм шинжилгээний бүтээл, судалгааны ажлыг судалгааны эргэлтэд оруулах, эрдэмтэн судлаачид хоорондоо хамтран ажиллаж орон нутгийн байгалийн онцлогт суурилсан аялал жуулчлал, ургамал, модны гарц тариалалтыг сайжруулах, говь нутгийн амьдралын хэв маяг, хүн ардын амьдрах орчин нөхцөл, усны хангамж, эрүүл мэнд гээд нэн шаардлагатай цаг үеийн асуудлуудыг шинжлэх ухааны үндэслэлтэй судлах, орон нутгийн удирдлагуудын хамт шийдвэрлэх арга замыг тодорхойлох зорилгоор байгуулагдсан юм. Энэ зорилгынхоо хүрээнд анхдугаар чуулганаа амжилттай зохион байгуулж байна".

"ТалыН ГЭГЭЭ Эрдэмтэд" ТББ-аас зохион байгуулсан тус арга хэмжээнд говийн бүсийн 7 дугаар тойргоос сонгогдсон УИХ-ын гишүүд, Дундговь аймгийн засаг дарга, ИТХ-ын төрсөн Академич, Шинжлэх ухааны доктор, Ардын багш зэрэг алдар гавьяатнууд хуран чуулж нутгийнхаа хөгжилд өөрийн эрдэм шинжилгээ судалгааны бүтээлээрээ хувь нэмрээ оруулах, хамтран ажиллахаар хүрэлцэн ирсэн юм. Тус аймгаас 200 гаруй эрдэмтэн, судлаач төрөн гарчээ. Тэд төрөлх Дундговь аймгийнхаа хөгжилд хувь нэмрээ оруулах, залуу судлаачдыг дэмжих, боловсрол, соёл, шинжлэх Ухааны чиглэлээр үйл ажиллагаа явуулж, хамтын ажиллагаагаа хөгжүүлэх зорилгоор ТББ байгуулжээ.

Дундговь аймгийн эрдэмтдийн "НУТГИЙН ХӨГЖИЛД ЭРДЭМТДИЙН ОРОЛЦОО" анхдугаар чуулган

Сэтгүүлч

Сэтгүүлч Ц.Соёлмаа soyolmaa@vip76.mn