![ОЛОН УЛСЫН БАЙГУУЛЛАГУУДЫН ТӨЛӨӨЛӨЛТЭЙ “ХОГ ХАЯГДЛЫН МЕНЕЖМЕНТ БА НҮХЭН ЖОРЛОН” ЗӨВЛӨЛДӨХ УУЛЗАЛТ ХИЙВ](http://enkhamgalan.mn/media/news/original/2024/07/06/455789e52e5e8bc8bfc09b1dd017b16b.jpg)
ОЛОН УЛСЫН БАЙГУУЛЛАГУУДЫН ТӨЛӨӨЛӨЛТЭЙ “ХОГ ХАЯГДЛЫН МЕНЕЖМЕНТ БА НҮХЭН ЖОРЛОН” ЗӨВЛӨЛДӨХ УУЛЗАЛТ ХИЙВ
УИХ-ын Гишүүн, БОАЖ-ын Сайд Б.Бат-Эрдэнийн санаачилгаар “Хог хаягдлын менежмент ба нүхэн жорлон” олон талт зөвлөлдөх уулзалт хийв.
Уулзалтын эхэнд Монгол орны ихэнх сум суурин газарт тэр дундаа гол мөрөн, нуурын ойролцоо хур хогны цэг үүссэн байна, мөн нүхэн жорлонгүй аймаг, сумыг байгуулахад хамтарч ажиллахыг хүслээ.
НҮБ-ын Монгол дахь Суурин зохицуулагч Тапан Мишра:- “Эрүүл мэнд болон ариун цэврийн асуудал салшгүй холбоотой. Бид ногоон монголыг бүтээхээс өмнө ариун цэврийн байгууламжийн асуудлыг нэн яаралтай шийдвэрлэх хэрэгтэй байна. Мөн хаягдал баттерейн асуудлыг цэгцлэх ёстой. Сайдын хэлсэнчлэн -45 градусын хүйтэнд цэцэрлэгийн насны хүүхэд хүртэл гадаа бие засаж байгаатай ч таарч байлаа. Тиймээс БОАЖЯ-наас манлайлал үзүүлж байгаа энэ асуудалд манай байгууллагын зүгээс бүрэн дэмжиж ажиллах болно”.
ТӨЛӨӨЛӨГЧИД ДАРААХ БАЙР СУУРИЙГ ИЛЭРХИЙЛЭВ
Хог хаягдлаас шатааж, ЭРЧИМ ХҮЧ боловсруулах үйлдвэрийг байгуулах боломж бүрэн бий. Гэвч орон нутагт үйлдвэр барих газар олголт хүндрэлтэй байдгаас энэ ажил ТЭГ зогсолттой байна. Тиймээс салбар дундын уялдаа холбоог сайжруулах, үйлдвэрлэгч, импортлогчийн өргөтгөсөн хариуцлагыг нэмэгдүүлэх талаар хог хаягдлын тухай хуульд нэмэлт өөрчлөлт оруулах хэрэгтэй байна.
“Хог хаягдлыг худалдаж авах, системийг бүрдүүлэх, аж ахуйн нэгжүүд бүтээгдэхүүнийхээ хаягдал сав, баглаа, шилийг эргүүлэн татдаг байх ёстой” гэх мэт саналууд тавьж байв.
Хуралд НҮБ-ын Хөгжлийн хөтөлбөр, Европын холбооноос хэрэгжүүлж буй төсөл хөтөлбөрүүд, НҮБ-ын Хүүхдийн сан, НҮБ-ын ХАБИТАТ байгууллага, Дэлхийн хүнс, хөдөө аж ахуйн байгууллага, Дэлхийн эрүүл мэндийн байгууллага, Азийн сан, ЖАИКА, БНХАУ-ын ЭСЯ, Япон Улсын ЭСЯ, Иран Улсын ЭСЯ-ны төлөөлөгчид оролцсон ба үйл ажиллагааныхаа төлөвлөлтөд оруулах, дэмжин ажиллахаа илэрхийлэв.