Швейцарийн Давос хотод дэлхийн эдийн засгийн 42 дахь удаагийн форум эхэллээ. “Их хувьсал: Шинэ загвар бүтээх” нэртэйгээр явагдаж буй тус форумд оролцохоор  Давосын амралтын газарт дэл­хийн 90 орны 2500 гаруй тө­лөөлөгч хүрэлцэн иржээ. Тө­лөөлөгчдийг форумын түүхэнд байгаагүй их цас угтсан байна. Гэвч удах­гүй дулаарч, өндөр ууланд орших амралтын газар нарлаг, тав тухтай болно хэмээн цаг уурчид мэдэгдэж байгаа. Харин эдийн засагч, улс­төрчид дэлхийн эдийн засаг нэлээд хүнд байх урьд­чилсан мэдээг гаргаж байна.

Давосын форумд төрийн болон Засгийн газрын 40 тэргүүн, түүнчлэн АНУ-ын Сангийн сайд Тимоти Гайтнер, НҮБ-ын Ерөн­хий нарийн бичгийн дарга Бан Ги Мүн, ОУВС-гийн гүй­цэт­гэх захирал Крис­тин Лагард, Дэлхийн банк­ны Ерөнхийлөгч Роберт Золлик нар хүрэлцэн иржээ.

Мөн өнгөрсөн жил дэлхийн нийслэлүүдийг нэлээд донсолгосон “Эзэл” хөдөл­гөөнийхөн, анархизм, даяаршлын эсрэг “Зүүний хөдөлгөөнийхөн” оролцож байгаа юм байна. Нэртэй төлөөлөгчид тэнд­хийн тансаг зочид буудлуудад буусан бол “Эзэл” хөдөлгөөнийхөн эскимосчуудын мөсөн овоо­хойг өөрсдөө барьж, тэндээ буу­дал­лажээ.

Форумыг нээж, Германы канцлер Ангела Меркель үг хэлсэн юм. Тэрбээр Европт төсвийн хатуу зарчим, эдийн засгийн асуудлыг шийдвэрлэх улстөрийн уян хатан механизм хэрэгтэйг энэ үеэр анхааруулав. Мөн тэрбээр еврог цаашид дэмжинэ гэдгээ мэдэгдээд Европын холбооны зарим орон амлалтаа бие­лүү­лэхгүй байгаагаас болж Европын зах зээл хүчтэй цохил­тод орж байгааг онц­лон тэмдэглэжээ. Ангела Меркель “Европын зарим орон сүүлийн үед амлалт, үүргээ биелүүлэхгүй байна. Гэтэл өнөөдөр итгэлцэл л дэлхийн зах зээл дээрх хамгийн найдвартай валют болсон гэдгийг мартаж болох­гүй” хэмээсэн байна.

Давос-2012-ын даргаар Ан­гела Меркелийг санам­саргүй сон­гоогүй юм. Учир нь Евро бүсийн эдийн засаг яг одоо тун аюултай нөхцөлд байгаа, мөн Герман улс Европын холбоонд тэргүүлэгчийн үүрэг гүйцэтгэдэг тул гол шийдвэрийг гаргаж чадна гэж үзжээ. Меркель түүнчлэн өмнөх санхүүгийн хямралаас Европ тив хангалттай сурал­цаж чадаагүй хэмээн мэдэгд­сэн байна. “2008 оны хямралын гүн ул мөр үлджээ. Үүний үр дагаврыг арилгахын тулд одоо ч гэсэн ажиллаж байна. Харин санхүүгийн зах зээлийг дахин бий болгох үйл ажиллагаа хангалттай түвшинд хүрэхгүй байна” хэмээн мэдэгдэлдээ дурджээ.

“Европын улс орнууд өнгөр­сөн онд багагүй хүнд­рэлтэй учирсан ч хямралаас гарах гарц хайхын тулд хамт­ран ажиллахад бэлэн гэдгээ баталж чадсан” гэж Германы канц­лер онцлон тэмдэглэсэн байна.

Санхүүгийн хямралын үр дагаврыг нэн тэргүүнд арил­гах нь чухал гэдгийг форумд оролцогчид мэдэгдэж байна. Гэхдээ Грекийн өрийн хямрал нэлээд таагүй үр дагавар авч ирэхийг ч анхааруулжээ.

Форумын бас нэг гол сэдэв бол орлогын тэгш бус байдал юм. Дэлхийн эдийн засгийн форумын баримтад дурдсанаар орлогын тэгш бус байдал нь дэлхий даяар эсэр­гүүцэл, эмх замбараагүй бай­дал үүсгэж, “Даяаршлын эрсдэл”-д оруулж болзошгүй гэнэ. “Кредит Суисс”-ийн мэдээлснээр дэлхийн хүн амын ядуу хэсэг нийт баял­гийн нэгхэн хувийг эзэмшиж бай­хад бараг тал хувь нь дэлхийн нэгхэн хувь болох баячуудад ногдож байгаа аж.

Энэ жилийн форумд нэр хүндтэй олон хүн ирээгүй. Оролцогчид До­миник Штраусс-Кан, Геор­гиос Папандреу нараас гадна Хятадаас сүүлийн 30 жилд анх удаа өндөр дээд хэм­жээ­ний төлөөлөгч орол­цоо­гүйд гай­хаж байгаагаа илэр­хийлж байв.

Швейцарийн Давос хотод болох дэлхийн эдийн засгийн форум энэ сарын 29 хүртэл үргэлжлэх юм байна.