Хан-Уул дүүргийн Гэмт хэргээс урьдчилан сэргийлэх ажлыг зохицуулах салбар зөвлөл өнөөдөр хуралдлаа.

Хуралдаанд Хан-Уул дүүргийн ИТХ-ын дарга Б.Цэрэн, Хан-Уул дүүргийн Засаг даргын нэгдүгээр орлогч Г.Батсайхан, дүүргийн мэргэжлийн хяналтын хэлтсийн дарга Б.Алтантуяа, Боловсролын хэлтсийн дарга Ж.Отгонхорлоо, Цагдаагийн газрын дарга, цагдаагийн хурандаа Д.Манлайбаатар болон зөвлөлийн бусад гишүүд оролцлоо.

Энэ онд Хан- Уул дүүрэг иргэдийнхээ аз жаргалтай, амар тайван амьдралын төлөө “ЭКО ДҮҮРЭГ АРХИГҮЙ ОРЧИН” зорилтыг дэвшүүлж,  гэмт хэрэг гаралтын шалтгаан нөхцөл болж байгаа архидалтыг багасгах чиглэлээр урьдчилан сэргийлэх, соён гэгээрүүлэх нөлөөллийн ажлуудыг шат дараатайгаар хэрэгжүүлж байгаа  бөгөөд дүүргийн ИТХ-ын дарга Б.Цэрэн ажлын үр дүнгийн танилцуулгыг хийлээ. 

Хан-Уул дүүргийн ИТХ-ын дарга Б.Цэрэн:

2020 оны нэг сарын 1-ний өдрөөс эхлэн Гэмт хэрэг, зөрчлөөс урьдчилан сэргийлэх тухай хууль шинэчлэн найруулагдаж, мөрдөгдөж эхэлсэн. Дүүрэг, нийслэл, улсын хэмжээнд үйлдэгдэж буй гэмт хэргийн хамгийн том шалтгаан нь архидалт гэсэн судалгаа гарсан.  Тиймээс бид үүнд идэвхийлэн анхаарч, өнгөрсөн наймдугаар сард 37 удаагийн “Архигүй орчин” олон нийтийн хэлэлцүүлгийг зохион байгуулсан бөгөөд үүнд 1800 гаруй иргэн оролцсон байна. Өнөөдөр дүүргийн Гэмт хэргээс урьдчилан сэргийлэх салбар зөвлөл хуралдаж, хийсэн ажлынхаа үр дүнг сонсож, цаашид ямар ажил хийж хэрэгжүүлэх талаар ярилцлаа. Олон нийтийн хэлэлцүүлгээр архидалт хавтгайрсан, өрх бүрт архины хамааралтай иргэн байна, түүнд бүгд санаа зовсон ч шийдэлд хүрч чадахгүй байна гэдгийг хэлж байсан.

Хэлэлцүүлгийн үеэр иргэд хэд хэдэн санал, санаачилгыг дэмжсэн бөгөөд үүнд “архигүй орчин тэмдэг тэмдэглэгээг дүүргийн нутаг дэвсгэрт байрлуулах, олон нийтийн эргүүл жижүүрүүдийг хурдан томилох, долоо хоног бүрийн нэгдэх өдрийг архи зардаггүй өдөр болгох, архи зарах хугацааг өглөөний 11:00-22:00 цагийн хооронд зарах асуудлыг НИТХ, Нийслэлийн Засаг даргад уламжлахаар болсон. Архины орц найрлага, савлагаан дээр анхаарах, архийг 18-аас доош градусаас доош болгохыг Засгийн газарт уламжилахаар боллоо. Дээрх ажлыг дан ганц цагдаагийн байгууллага хийх боломжгүй учир хүн хүчний асуудлыг Засаг дарга, хороон дарга нар шийдвэрлэхээр болсон.  Үүнээс гадна албадан эмчилгээ, баривчлах байруудад ажиллаж, хэлэлцүүлгийг зохион байгуулах үеэр “архинаас гарахад  төр дэмжлэг үзүүлээч, ажлын байраар дэмжвэл байнгын архидалтаас сэргийлэх, орчин нөхцлөө өөрчлөх боломж байна” гэж олон иргэдээс санал ирсэн.

Хан-Уул дүүргийн Засаг даргын нэгдүгээр орлогч Г.Батсайхан:

2020 оны нэгдүгээр сараас Гэмт хэрэг, зөрчлөөс  урьдчилан сэргийлэх ажлыг зохицуулах салбар зөвлөл орон нутгийн түвшинд хэрхэн ажиллах вэ, ямар эрх хэмжээтэй байх вэ, иргэдээ гэмт хэргээс урьдчилан сэргийлэх талаар ямар ямар ажил хийх боломжтой вэ гэсэн бүх асуудлыг тусгасан шинэ хууль хэрэгжиж, шинэ зохион байгуулалтаар ажлын алба байгуулагдан, далайцтай ажлуудыг хийж хэрэгжүүлж байна. Оны эхний улиралд бид архигүй орчинг бий болгох зорилгоор “Архигүй орчин” хөтөлбөрийг эхлүүлсэн нь үр дүнтэй байсан учраас дүүргийн хэмжээнд “Архигүй орчинг бүтээцгээе” аяныг өрнүүлсэн. Гэмт хэргээс урьдчилан сэргийлэх салбар зөвлөл нь хуулийн хүрээнд санхүүжүүлэх боломжтой олон нийтийн байцаагч нарын орон тоог шийдвэрлэж, үүний дагуу хороодыг зохион байгуулалтад оруулж ажиллалаа. Архидалт  ахуйн хүрээнд их үйлдэгддэг учир үүнийг таслан зогсооход олон нийтийн байцаагч нарын үүрэг маш их байна. Үүнээс гадна иргэдийг соён гэгээрүүлэх ажил хийх, архины савлагаа, градуст хяналт тавих нь зүйтэй юм байна гэж үзэж холбогдох газруудад уламжлахаар болсон.

Дүүргийн Мэргэжлийн хяналтын хэлтсийн дарга Б.Алтантуяа:

Дүүргийн Гэмт хэргээс урьдчилан сэргийлэх салбар зөвлөл оны эхэнд төлөвлөгөө гаргаж, “Архигүй орчин” аяныг зохион байгуулахаар болсон. Тэгвэл өнөөдөр бид үр дүнгээ хэлэлцэж, холбогдох шийдвэрүүдийг дээш нь уламжлахаар боллоо. Хэдийгээр өнөөдөр  Covid-19 халдвараас урьдчилан сэргийлэх онцгой нөхцөл байдал үүссэн ч хэдий ч бид үндсэн хуулиар хүлээсэн үүргийнхээ дагуу архигүй орчинг бүрдүүлэх, гэмт хэргээс урьдчилан сэргийлэх ажлыг найман сарын хугацаанд амжилттай хийсэн байна. Манай мэргэжлийн хяналтын байгууллагын зүгээс шалгалтыг  иргэдээс ирсэн саналууд  дээр тулгуурлан архины хаяг шошго, худалдаа үйлдвэрлэлд хяналт тавьж ажиллалаа. Хэрэлцүүлгийн үеэр иргэдийн зүгээс ажил хэрэг болгомоор олон саналууд ирсэн. Үүнд архинд донтуулагч бодис байгаа эсэхийг шалгах, архины хатуулгыг бууруулах, савлагааг өөрчлөх гэх мэт. Бидний зүгээст дээрх саналуудыг ажил хэрэг болгох тал дээр анхаарч ажиллах болно.