2019.04.03
Төрийн удирдах албан тушаалтнууд казино тоглосон нь тогтоогдвол хариуцлага тооцно
Засгийн газар ээлжит хуралдаанаа хийж өнөөдрийн хуралдаанаар 23 асуудал хэлэлцэхээс хоёр дахь асуудлыг ЗГХЭГ-ын дарга Л.Оюун-Эрдэнэ хэлэлцүүлж шийдүүлжээ.
Тодруулбал, бүх шатны төрийн албан хаагчид, тэр дундаа төрийн удирдах албан тушаалтнууд, төрийн өмчит үйлдвэрийн газрын захирлууд хэрвээ ямар нэгэн байдлаар мөрийтэй тоглоомын газар тоглосон нь баримтаар нотлогдох, бичлэг нь задарвал ёс зүйн дүрэм зөрчсөн үндэслэлээр ажлаас нь чөлөөлж хариуцлага тооцох аж.
Энэ талаар ЗГХЭГ-ын дарга Л.Оюун-Эрдэнэ
"Олон улсын туршлагаас харахад төрийн албан хаагчид мөрийтэй тоглохыг хориглосон байдаг ба манай улсын төрийн албан хаагч казино тоглосон нь тогтоогдвол ажлаас чөлөөлөх хүртэлх хариуцлага яригдана гэдгийг мэдэгдээд хэвлэл мэдээлэл олон нийт энэ асуудалд анхаарал хандуулан ажиллаж Засгийн газрын хэрэг эрхлэх газарт мэдээлэл өгөхийг хүслээ. Солонгосын казинод манай улсаас хамгийн олон төрийн албан хаагч тоглодог гэсэн статистик бий. Засгийн газар төрийн албан хаагчдынхаа цалинг нэмж байгаа ч Солонгост хар ажил хийж байгаа төвшинд аваачиж чадахгүй байна гэсэн үг шүү дээ. Тэр нь сард 4.5-5 сая төгрөг. Гэтэл төрийн албан хаагчид буюу төрийн өмчит үйлдвэрийн газрын захирлууд казинод тоглодог тоогоор манай улс дээгүүрт орж байна гэсэн судалгаа өгч байна" хэмээлээ. Үүнийг цэгцлэх цаг нь болсон гэдгийг тэрбээр өмнө нь мэдэгдэж байсан юм.
