100 мянган айлын орон сууцны төсөл яригдаж байгаа шигээ бодит байдал дээр хэрэгжиж эхлээгүй байгаа гэхэд болно. Энэ төслийн талаар ЗТБХБ-ын шинэ сайд Ц.Дашдорж "Бага дунд орлоготой иргэдийг зургаан хувийн хүүтэй орон сууцаар хангах ажлыг үргэлжлүүлнэ" гэсэн амлалт өгөөд байгаа. Тэгвэл энэ ажлын явц ямар байгаа талаар Газрын харилцаа, барилга, геодези, зураг зүйн газрын Газрын харилцаа, хот байгуулалтын албаны дарга Р.Ганхуягаас тодрууллаа.

-100 мянган айлын орон сууцыг босгох хөрөнгө шийдэгдсэн гэж дууллаа. Үнэн үү?

-Өнөөдөр /өчигдөр/ Засгийн газраар орж хэлэлцүүлэгдсэн.  Энэ үеэр гол тогтоолууд орсон. Тухайлбал, 100 мянган айлын орон сууцыг ашиглалтад оруулахдаа иргэдийг яаж хамруулах вэ гээд тодорхой зүйлүүд яригдсан.

-Энэ төсөлд хэчнээн төгрөг төсөвлөгдөөд байна?

-Засгийн газраар төслийг хэлэлцүүлэх үед чиг үүрэг өгөх байх. Түүнийх нь дагуу мөнгө санхүү нь шийдэгдэнэ. Энэ ажилд нийт 11 их наяд төгрөг шаардлагатай гэсэн тооцоо бий. Энэ бол яг тодорхой тоо биш. Эхний удаад Буянт-Ухаад 12500 айлын орох сууц барих ажил эхэлсэн. Энэ зүгт ДЦС IV-өөс шугамыг өргөтгөн татсан. Баянголын дулааны станцаас 88 гега калори дулааныг гаргаж байгаа ба гэрэл дулааны асуудалд нийт 100 тэрбум төгрөг шаардагдаж байгаа. Хэрвээ тавдугаар цахилгаан станц баригдвал асуудал шийдэгдэх бүрэн боломжтой юм билээ.

-Хаана хаана орон сууц барихаар төлөвлөөд байгаа билээ?

- Нийслэлд 75 мянга, орон нутагт 25 мянган орон сууц барихаар анх төлөвлөсөн. Тодруулбал, Улаанбаатар ротын хувьд Нисэх, Яармагийн дэнж, Баянгол уулын нутагт барилгын ажил явагдаж байгаа юм. Мэдээж барилга байгууламжийг зөвхөн бариад зогсох биш дулаан цахилгаан, ус бохирын асуудал зэрэг чухал асуудлууд олонбий.

-Энэ асуудлуудыг яаж шийдвэрлэж байгаа вэ?

- Дамбадаржаа Дарь-Эх орчмын усан хангамжийн асуудлыг шийдвэрлэхээр Японы Засгийн газрын тусламжтай Гачууртад усны станцын талаар судалгаа хийгдэж байна. Мөн Яармаг.Нисэх орчмын усан станц барих судалгааг Солонгосын Засгийн газрын цаг уурын өөрчлөлтөд зориулсан хөтөлбөр бий. Харин бохирын асуудлыг Герман-Монголын Засгийн газар хамтран хоёр дахь жилдээ судалгааны ажил хийгдсэн. Энэ мэт асуудал шийдэгдээд, төсөв санхүүг нь баталчихвал ажил ерөнхийдөө урагшилна.

-Өнөөдөр /өчигдөр/ Засгийн газар хэлэлцээд асуудлыг шийдчихвэл ажил нэлээд урагшилна гэж ойлгож болох уу?

-Засгийн газар танилцаад эхний удаад чиг үүрэг өгч, холбогдох албаны хүмүүст даалгавар өгөх байх. Ингээд дараа нь танилцаж, асуудлыг нэг мөр шийдэх байх.