БСШУЯ-ны байранд:

09.00 цагт: Жил бүр уламжлал болгон зохион байгуулдаг Залуу монгол судлаачдын зуны сургалт эхэлж буйтай холбогдуулан  БСШУЯ-аас мэдээлэл хийнэ.

2015 оны Залуу монгол судлаачдын зуны сургалтад Орос, Герман, Швейцар, Чех, Унгар, Турк, Казакстан, Хятад, Япон, БНСУ, БНАСАУ зэрэг 11 орны 18 их сургууль, судалгааны төвөөс 29 залуу судлаач, оюутнууд оролцохоор хүрэлцэн ирээд байна.

МЗХ-ны 209 тоотод 

11.00 цагт: Монголын Залуучуудын Холбооны Хүмүүнлэгийн Байнгын Хорооны залуучууд өнгөрсөн наадмын өдрүүдэд Налайх дүүрэгт гэр нь шатах үеэр, шатаж буй гэрээс дүүгээ авраад өөрөө галд 80 хувь түлэгдсэн баатарлаг хүү А.Цэрэнтогтоход туслах "Ахыг аваръя" хандивын аянаар багагүй хэмжээний хандив цуглуулснаа олон нийтэд мэдээлэх хэвлэлийн бага хурал болно. 

НЗДТГ-ын Б танхимд 

11.00 цагт: Монгол Улсад анхны Ардчилсан чөлөөт сонгууль явагдсан түүхэн үйл явдлын 25 жилийн ойн баярыг энэ сарын 29, 30-ны өдрүүдэд тэмдэглэхээр болсон билээ. Энэхүү ажлын хүрээнд НЗДТГ-аас Чингисийн талбайд “Алдарын хүндэтгэл” тоглолтыг энэ сарын 30-ны өдөр зохион байгуулах гэж байгаатай холбогдуулан хэвлэлийн бага хурал хийнэ. 

Хүүхдийн ордоны бага зааланд:

13.30 цагт: Хөгжлийн бэрхшээлтэй хүүхдүүдийн төлөө ажилладаг ТББ-ууд нэгдэн Холбоо байгуулах гэж байна. "Хөгжлийн Бэрхшээлтэй Хүүхдүүдийн Төлөө Нэгдсэн Холбоо"-нд өнөөдрийн байдлаар 5 байгууллага, 1 төв нэгдээд байгаа аж. 

Blue sky

14.00 цагт: Зориг сан, Бүгд найрамдахчуудын Олон улсын хүрээлэн хамтран Монголд ардчилал эхэлсэн түүх гэрэл зургийн цомгийг хэвлэн гаргажээ. Цомогт Монголын ардчилсан хувьсгалын чухал мөчүүдийг Англи, Монгол хэл дээрх тайлбарын хамт багтаасан байна. Энэхүү цомгийн нээлт өнөөдөр болно.