Улсын Их Хурлын дарга Д.Дэмбэрэл тогтоолын төслийг нэн даруй байнгын хороодоор хэлэлцүүлж, чуулганы хуралдаанаар оруулахаа илэрхийллээ.Төсвийн тодотгол хийхдээ энэ оны төсвийн урьдчилсан гүйцэтгэлд үндэслэн төсвийн орлогын эх үүсвэрийг бүрэн дайчлах, төсвийн байгууллагын албан хаагчдын цалин, Нийгмийн даатгалын болон Нийгмийн халамжийн сангаас олгох тэтгэвэр, зарим тэтгэмжийг үе шаттай нэмэх хугацааг наашлуулах, Засгийн газрын бүрэлдэхүүний тухай хуулийн зарим заалтыг хүчингүй болсонд тооцох тухай хуулийн хэрэгжилтийг хангах зарчим баримталжээ.

Засгийн газар цалин, тэтгэвэр, зарим тэтгэмжийг 2012 оны 04-р сарын 01 болон 2012 оны 10-р сарын 01-нд тус тус нэмэх байсан боловч гурван талын хэлэлцээр хийсний дүнд 2012 оны 02-р сарын 01-нээс нэмэх шийдэлд хүрсэн. Энэ асуудлыг төсөвт тодотгол хийх замаар асуудлыг шийдье гэж УИХ дахь намын бүлгүүд тохиролцсон юм.

Мөн Засгийн газрын тухай хуульд өөрчлөлт орж, Тэргүүн шадар сайдын харъяалж байсан агентлагуудыг Шадар сайд болон Хууль зүй дотоод хэргийн сайдад шилжүүлэх болсонтой холбогдуулан Төсвийн тодотголын тухай тогтоолыг өргөн барив гэж УИХ-ын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.