Өчигдөр /2025.04.01/ болсон Санхүүгийн тогтвортой байдлын зөвлөлийн ээлжит бус хурлаар гадаад валютын улсын нөөцийг нэмэгдүүлэх чиглэлээр өмнөх хурлаар өгсөн үүрэг даалгаврын хэрэгжилт, алтны санхүүжилт, гадаад эх үүсвэр татахад банкуудад бодлогын дэмжлэг үзүүлэх зэрэг асуудлыг хэлэлцлээ.

Хуралд Монголбанкны Ерөнхийлөгч Б.Лхагвасүрэн, Санхүүгийн зохицуулах хорооны дарга Т.Жамбаажамц, Хадгаламжийн даатгалын корпорацын гүйцэтгэх захирлын үүрэг гүйцэтгэгч С.Баатарсүрэн болон бусад албаны хүмүүс оролцлоо. Хэлэлцсэн асуудалтай холбогдуулан Монгол Улсын Засгийн газар, Монголбанканд зөвлөмж хүргүүлэхээр тогтлоо.

7 хоногийн өмнө болсон ээлжит бус хурлаар Монгол улсын банк, санхүүгийн байгууллагуудын гадаад зах зээлд байршуулсан нөөцийг дотоод эдийн засагт татаж байршуулан эдийн засгийн эргэлтэд оруулах, үүнтэй уялдуулан Төсвийн тухай хуулийн хүрээнд Засгийн газрын дотоод үнэт цаас гаргахаар шийдвэрлэсэн. Энэ хүрээнд Хадгаламжийн даатгалын корпорацын эзэмшиж буй Монгол Улсын Засгийн газрын гадаад бондыг үнийн хэлбэлзэл үүсгэхгүйгээр арилжаалж, чөлөөлөгдөх гадаад валютын нөөцийг Монгол улсын дотоод зах зээлд оруулж ирэх зөвлөмжийг СТБЗ-өөс Хадгаламжийн даатгалын корпорацад хүргүүлсэн юм.