Дорноговьчууд азтай, од­­той бай­­на. Далан жи­лийн дараах их бүтээн байгуулалт  Сайншанд, Чойбалсан, Далан­задгад чиглэлийн 1100 км  төмөр зам  Дор­ноговь аймгаас эхэлж байна. Наран ургах дорнын говь  анхны борооноор өнгөө зассан, хүн зоны сэтгэлд их бүтээн байгуулалтын ажлыг эхлүүлэх хүсэл зориг, итгэл найдвар дүүрэн  энэ сарын 22-ны өдөр Сайншандаас арав гаруй кило­метр, хэвтээ тэнхлэгийн тө­мөр замын 0 цэг  “Хар тойром” гэх  газар  “Хөгжлийн төмөр зам”-ын их ажил ундарлаа.

Шинэ төмөр замын шав тавьж, аравнайлах ёслолд Зам тээвэр, барилга хот байгуулалтын сайд Х.Баттулга, дэд сайд А.Гансүх, УИХ-ын гишүүн Я.Батсуурь, ЗТБХБЯ-ны Төрийн нарийн бичгийн дарга, Ж.Бат-Эрдэнэ, "Монголын төмөр зам" ТӨХК-ийн захирал Б.Батзаяа, Улаанбаатар төмөр замын ХНН-ийн нэгдүгээр орлогч дарга А.И.Домбровский, Дорноговь аймгийн Засаг дарга П.Ганхуяг, бусад албаны хүмүүс  оролцсон юм. Баяр бахдал, хариуцлага дагуулсан  нөр их аж­лыг эхлүүлэх торгон мөчийг хуваалцахаар  Хөгж­­­­лийн төмөр замын анхны шанг татах “Дорнын төмөр зам", “Улаан­баатар төмөр зам” ТӨХК-ийн удирдлага, ажилтнууд, айм­гийн МСҮТ-ийн  замын ангийн  оюутнууд болон сайншандчууд хүрэлцэн ирсэн байв. Их бүтээн байгуулалтын салхийг хагалж буй тэдний  сэтгэгдлээс хуваалцсанаа хүргэе.

“Монголын төмөр зам” ТӨХК-ийн Замын IV ангийн 12 дугаар хэлтсийн  ажилтан Б.Бат-Эрдэнэ:

Их бүтээн бай­гуулалт Сайн­шанд­аас эхэлж байгаад маш их баяртай  байна. Шинэ төмөр зам дорноговьчууд төдийгүй улс орны хөгжилд шинэ дэвшил  авчрах нь гар­цаагүй. Би төмөр замын салбарт 14 жил ажиллаж  байна. Энэ хугацаанд Замын-Үүдэд дөрвөн зөрлөг шинээр барих ажилд гар бие оролцож байлаа. Зам дагаж хөгжил гэдэг. Шинэ төмөр  зам баригдсанаар Дорноговьд ажлын байр нэмэгдэж, ард иргэдийн амьдрал дээшилнэ.

Дорноговь аймгийн Төмөр замын  МСҮТ-ийн Замын ангийн оюутан Н.Анхбаяр:

Чухал цаг үед, чухал мэргэжлээр сурал­цаж байгаа нь азтай хэрэг гэж боддог. Би МСҮТ-ийг төгсөөд шинэ төмөр замын бүтээн байгуулалтад  орол­цож, ажлын  байртай болно. Энэ бол том боломж юм. Залуу хүний хувьд  түүхэнд том үсгээр тэмдэглэгдэн үлдэх ажилд  оролцож байгаадаа баяртай байна.

“Дорнын төмөр зам” компанийн ажилтан Ч.Даваадорж:

Их бүтээн  бай­­­гуулалтын аж­­­лыг манай ком­пани эх­лүүлэх­ээр шал­гар­­­­санд баяр­­тай байна. Би “Дорнын төмөр зам” компанид дөрөв дэх жилдээ ажиллаж байгаа. Ирээдүйд үр хүүхэддээ бахархан дурсах сайхан үйл явдлын гэрч боллоо гэж бодож байна. Үүний цаана олон хүний хөдөлмөр зүтгэл,  зохион байгуулалтын ажил ундарч байгаа шүү дээ.

Газраа  хагалж, далангаа босгон ажлаа эхлүүлж буй  хүмүүсийн сэтгэгдэл өндөр байна. Дорнын говийг Тавантолгойтой холбосон төмөр замын ач холбогдлын талаар салбарын сайд Х.Баттулга үг хэлсэн юм. Тэрбээр  "Засгийн газраас “Төрөөс төмөр замын тээврийн талаар баримтлах бодлого”-ын эхний үе шатанд хэрэгжүүлэх төмөр замын суурь бүтэц барих ажил амжилттай эхэллээ.  1900 км урт Монголын төмөр зам эдийн засгийн гол бүс нутгийг холбосон нийт ачаа эргэлтийн 90 орчим хувь, зорчигч эргэл­тийн 40 гаруй хувийг гүйцэтгэх хүчин чадал бүхий салбар болтлоо хөгжжээ. Төмөр замын салбарын хоёр дахь бүтээн байгуулалтын ажлыг 2.5 жилд багтаан дуусгахаар төлөвлөсөн. Ингэс­нээр гадаад худалдаа, эдийн засгийн шинэ гарц нээгдэж, ашигт малтмалын томоохон орд газруудыг ашиглах, бүтээгдэхүүнийг тээвэрлэх, экспортлох нөхцөл боломж бүрдэнэ. Үүнээс гад­на хүн амын суурьшил, хот байгуулалт, байгаль орчныг хамгаалах асуудлыг цогцоор нь шийдэх боломж бүрдэнэ. Салбарын үсрэнгүй  хөгжил, ирээдүйг тодорхойлох хариуцлагатай цаг үед тулж ирээд байна. Төмөр замын суурь бүтэц барих ажлыг цаг хугацаанд нь чанартай гүйцэт­гэж, төлөвлөсөн хугацаанд хүлээлгэн өгнө гэдэгт итгэж байна”  гэв.


Монгол Улсын Засгийн газраас “Улаанбаатар төмөр зам”  Хувь нийлүүлсэн нийгэмлэг, “Дорнын төмөр зам” ХХК төмөр зам барих тусгай зөвшөөрөл олгосон тухай шав тавих ёслолын үеэр дуулгаж, ком­паниуд­ын удирдлагуудад гэрчилгээг нь гар­дуулан өглөө. Тавантолгойг холбосон 1100 км төмөр замын ажлыг хэн гүйцэтгэх, хөрөнгө оруулал­т­ыг хэрхэн шийдэх вэ зэрэг асуултын хариултууд ийнхүү эхнээсээ гарч байна. Эхний ээл­жинд Сайншандаас Баруун-Урт руу чиглэсэн 100 км замыг “Улаанбаатар төмөр зам”  ХНН, харин Сайншандаас Тавантолгой руу чиглэсэн 100 км төмөр замыг “Дорнын төмөр зам” ХХК тавихаар тендерт шалгарч, ажилдаа  шуурхайлан орж байгаа нь энэ. Төмөр зам барина гэдэг хүн хүч, хөрөнгө мөнгө шаарддаг  ажил учир цаашид хэдэн арван компанид дээрх тусгай зөв­шөөрлийг олгох аж. Түүнчлэн хэн бүхний анхаарлыг татаж буй Хөгжлийн төмөр зам барих хөрөнгийн эс үүсвэрийг талаар  сайд Х.Баттулга “Төмөр зам барих ажилд зарцуулах хөрөнгийн судал­гааг Америкийн компани  хийж байгаа.  Хөрөн­гийн эх үүсвэртэй холбоотой баримт бич­гүүд ирэх сарын сүүл, зургадугаар сарын эхэнд бэлэн болно. Одоо ажлаа эхэлж буй компаниудын хувьд эхний ээлжинд хөрөнгөө өөрсдөө гаргаж байна”  гэсэн юм.

Хөгжлийн төмөр зам барихад боловсон хүчин хамгаас чухал. Дорноговьчууд төмөр  замын ангийн мэргэжилтэй ажилтан бэлтгэх МСҮТ-ийг энэ онд байгуулжээ. Тус МСҮТ-д 90 гаруй оюутан өртөөний жижүүр, найруулагч, засварчин, замчин мэргэжлээр суралцаж байгаа бол цаашид туслах машинч, төмөр замын дохио­лол холбооны монитор мэргэжлээр 500 гаруй оюутан суралцуулах боломжтой юм байна. 1100 км шинэ төмөр замын 300 гаруй км нь Дорноговь аймгийн нутгаар дайран өнгөрч буй. Аж үйлд­вэр­ийн цогцолбор болох зорилт тавьж буй тус аймагт шинэ төмөр зам ямар үр өгөөж өгөх талаар  аймгийн Засаг дарга Д.Ганхуягаас тодруулахад “Монгол Улсын газрын доорх баялгийг эцсийн бүтээг­дэхүүн болгон боловсруулж, худалдах аж үйлдвэрийн цогцолбор нь Сайншанд болох юм. Үүний баталгаажуулах эхлэл шинээр баригдах төмөр зам. Эхний ээлжийн 1100 км төмөр зам ашиглалтад ороход 1000 хүний ажлын  байр бий болно. Үүнийг дагаад уурхайнууд ашиглалтад орж, түүхий эдийг энэхүү төмөр замаар тээвэр­лэж, Сайншандад боловсруулахад 20-30 мянгаар тоологдох ажлын байр  нэмэгдэнэ гэсэн үг” гэх гэлээ.

Ийнхүү Дорноговь аймгийн Сайншанд хотоос  төмөр замын салбарын бүтээн байгуулал­т­ын хоёр дахь давалгаа эхэллээ. Шав тавих ёслол болсон “Хар тойром” гэх газарт түрэгч трактор тоос татуулан газраа хагалж, хүнд машин механикмын нүргээн цуурайтаж байв.

Судалгаа, хөрөнгө мөнгө, бичиг цаас, гэрээ хэлэлцээрийн шатанд удтал хүлээлгэсэн “Хөгжлийн төмөр зам” замдаа гарлаа”. Бариандаа цагтаа ирэх болтугай.