Энэ сарын 3, 4-ний өдрүүдэд ихэнх нутгаар их цас орж, хүчтэй цасан шуурга шуурсны улмаас үзэгдэх орчин хязгаарлагдах, хальтиргаа гулгаа үүсэх, зам, даваа цасанд хаагдах нөхцөл байдал үүсчээ.

Иймд 3-ны өдрийн 21:00 цагаас эхлэн тээврийн хэрэгслийн хөдөлгөөнийг цаг агаарын нөхцөл байдал сайжиртал тодорхойгүй хугацаагаар түр хязгаарлаад байна. 

Одоогийн байдлаар долоон аймгийн 20 суманд /Архангай аймгийн Хашаатсум, Баян-Өлгий аймгийн Буянт, Бугат сум, Говь-Алтай аймгийн Есөнбулаг сум, Говьсүмбэр аймгийн Сүмбэр сум, Завхан аймгийн Асгат, Баянхайрхан, Дөрвөлжин, Завханмандал, Нөмрөг, Отгон, Сонгино, Түдэвтэй, Тэлмэн, Тэс, Улиастай, Шилүүстэй, Эрдэнэхайрхан сум, Өмнөговь аймгийн Сэврэй сум, Увс аймгийн Давстсум/ их цас орж, цасан шуургатай байна. 

Их цас, цасан шуурганы үеэр сураггүй болсон 83 иргэнээс /үүнээс 14 малчин малтайгаа шуурганд уруудсан/ 53 иргэнийг эсэн мэнд олж, 30 иргэнийг эрэн хайх ажил үргэлжилж байна. 

Цасан шуурганы улмаас Увс аймгийн Давст сумын нутагт 700 гаруй бог мал цасанд дарагдсныг тус аймгийн Онцгой байдлын газар, орон нутгаас шуурхай арга хэмжээ авч, 690 малыг цаснаас гаргажээ. 

Эрэн хайх, аврах, хор уршгийг арилгахад төв, орон нутгийн Онцгой байдлын анги, байгууллагаас 24 албан хаагч, 4 автомашин, нутгийн захиргааны байгууллагын 155 хүн, 28автомашин, нийт 179 хүн, 32 автомашинтай ажилласан байна.