УИХ-ын чуулганы /2025.04.03/-ны өдрийн хуралдаанаар  Монгол Улсын үндсэн хуулийн цэцийн 2025 оны 2-р дүгнэлтийг хэлэлцлээ.

Хэлэлцэж буй асуудалтай холбогдуулан гишүүд байр сууриа илэрхийллээ.

УИХ-ын гишүүн А.Ариунзаяа: 

ҮХЦ-ийн дунд суудлын хуралдаанд мэдээлэл гаргаж гомдол ирүүлсэн О.Баясгалан танд талархлаа дэвшүүлье. Нэг салбар дээр ялгаварлан гадуурхсантай нэгэн адилаар яг энэ тэтгэврийн нас болоод бусад нөхцөл дээр нь 10 салбар байгууллага дээр тусгайлсан нөхцөл явж байгаа. Үүнийг нэг зарчмаар бусад байгууллагуудыг ч гэсэн цэгцлэх нь зүйтэй гэдгийг Д.Цогтбаатар дарга сая хэллээ. Нийгмийн даатгалын ерөнхий хуулиар зохицуулагдаж байгаагаас гадна салбар салбарын тухайн үеийн хүчтэй сайд нар салбараа хамгаалж, шийдвэр гаргагчид өөртөө давуу байдал үүсгэж өөрчлөлтүүдийг хийсэн байдаг.

Энэ нь эргээд төсвийн татаасаар зохицуулагдаж,татвар төлөгчдийн мөнгөөр дамжиж тухайн салбараас тэтгэвэрт гарч байгаа хүмүүст давуу байдлыг үүсгэдэг. Ийм учраас үндсэн хуулийн дунд суудлын шийдвэрээр гаргасан Үндсэн хууль Монгол Улсад хууль ёсоор оршин суугаа хүн бүр хууль шүүхийн өмнө эрх тэгштэй байна гэдэг агуулгаар нийгмийн даатгалын багц хуулийн энэ шинэчлэлийг оруулж ирэх гэж байгаа бол бусад салбарын хуулиудыг хүчингүй болгох, хууль ижил тэгш үйлчилдэг байх тал дээр нь анхаарах нь зүйтэй.

Салбарууд 55 байтугай 45 насандаа тэтгэвэрт гарч, шимтгэл төлөх, төлөхгүй асуудал байна. Ердийн хүмүүс цалингийн дунджийн 45%-аар тогтоолгож байхад зарим салбар 80%-аар тогтоолгогдож байна. Энэ бол шударга бус. Аливаа нийгмийн хамгаалал тухайн салбартаа байж болно. Гэхдээ үүнийг нийгмийн даатгалын салбарт биш өөр өөрсдийнхөө салбарынхаа тэтгэвэр тэтгэмжийнхээ тусгайлсан сангаар гэх мэт бодлогуудаа явуулсан нь зүйтэй.

Сэтгүүлч

Сэтгүүлч Ц.Соёлмаа soyolmaa@vip76.mn