Батлан хамгаалахын сайд С.Бямбацогт эх орноо хамгаалах хүндтэй бөгөөд нэн хариуцлагатай албыг насан туршийнхаа ажил үйлс болгон цэргийн дээд цолтон генералууд болсонд нь баяр хүргэлээ.

Монгол Улсын Ерөнхийлөгч, Зэвсэгт хүчний Ерөнхий командлагч У.Хүрэлсүх Зэвсэгт хүчний Хуурай замын цэргийн командлагч бригадын генерал Ч.Цогтжаргалд хошууч генерал, ЗХЖШ-ын Ажиллагааны удирдлагын газрын дарга хурандаа Д.Дугаррагчаа, ЗХЖШ-ын Хяналт шинжилгээ, үнэлгээний газрын дарга хурандаа С.Баяр-Очир, Зэвсэгт хүчний Барилга-инженерийн цэргийн удирдах газрын дарга хурандаа Х.Батсайхан, Зэвсэгт хүчний Хуурай замын цэргийн штабын дарга хурандаа Ц.Буяндэлгэр нарт бригадын генерал цол олгож шагналыг гардууллаа.

С.Бямбацогт "Монгол төрийн генералууд бол өвөг дээдэс, ахмад үеийнхээ үйл хэргийг нэр төртэй залгамжилж, өдгөө ч өргөсөн тангарагтаа үнэнчээр зүтгэн батлан хамгаалах бодлого, зорилт, үйл ажиллагааны түшиг тулгуур, удирдан зохион байгуулагчид, үлгэрлэн дагуулагч манлайлагчид нь юм. Та бүхнийг Монгол цэргийн Их хар сүлд өнө мөнхөд ивээж, Монгол цэргийн яруу алдар үеийн үед мандан бадрах болтугай" хэмээжээ.