Сэтгүүлч бэлтгэдэг зургаан их, дээд сургуулийн хамтарсан баг “Эрүүл мэндийн сэтгүүл зүй” хөтөлбөрийг эх орондоо анхлан боловсруулж 2024 оны хичээлийн хөтөлбөртөө нэвтрүүлсэн.

Тус хөтөлбөрийг ажил хэрэг болгоход УИХ-ын гишүүн О.Саранчулуун 3 жилийн өмнөөс гар бие бөгөөд хэрэгжиж эхэлсэнд баяртай байна гэсэн юм.

Үргэлжлүүлэн тэрбээр “Сэтгүүлчидийн маань эрүүл мэндийн цагаан толгой сайжирвал ард иргэдэд мөн ч нэмэртэй. Тэгвэл өнөөдөр эхний сургууль болох Отгонтэнгэр их сургуулийн сэтгүүл зүйн 4 дүгээр курсийн оюутнууд “Эрүүл мэндийн сэтгүүл зүй” хичээлийг ийн судалж эхэллээ. Хичээлийг "Цагаан үзэг" холбоог үүсгэн байгуулагч, эрүүл мэндийн сэтгүүлч, докторант Б.Ундрах багш заасан юм” хэмээв. 

“Хөтөлбөр хэрэгжсэнээр эрүүл мэндийн сэтгүүлчдийн эгнээ тэлнэ” 

Энэ үеэр ОТИС-ийн сэтгүүл зүйн тэнхимийн багш М.Дэлгэрцэцэг хэлэхдээ “Манай сургуулийн хувьд энэ жилийн хичээлийн II улирлаас эхлэн “Эрүүл мэндийн сэтгүүл зүй” хичээлийг төгсөх курсийн оюутнууддаа зааж эхэллээ. Манай улсын хүн амын эрүүл мэндийн асуудал ямар түвшинд байгааг хүн бүр мэднэ. Энэ асуудалд хэвлэл мэдээлэл, сэтгүүлчдийн оролцоо, нөлөөг өндөрсгөхөд энэхүү хөтөлбөр өндөр ач холбогдолтой гэж багш хүний хувьд харж байна.

Тус хичээлийг судалж буй оюутнууд “Өнөөдөр сэтгүүл зүйн салбар төрөл болох “Эрүүл мэндийн сэтгүүл зүй” хичээл 2 паар орлоо. Тодорхой ойлголтгүй байсан ч эхний хичээлээ маш сонирхож, зайлшгүй судлах хэрэгтэй хичээл байсныг бид ойлгосон. Мөн ард, иргэдийн эрүүл мэндийн мэдлэг, хандлагыг нэмэгдүүлэхэд мэргэшсэн эрүүл мэндийн сэтгүүлчдийн үүрэг, оролцоо, нөлөө их гэдгийг олон улсын олон жишээгээр багш тайлбарлаж байсан нь их сонирхолтой байлаа” хэмээн сэтгэгдлээ хуваалцаж байв.

Хөтөлбөрийг одоогийн байдлаар Монгол Улсын их сургууль (МУИС), Монгол Улсын Боловсролын их сургууль (МУБИС), Анагаахын шинжлэх ухааны их сургууль (АШУҮИС-НЭМС), Хүмүүнлэгийн их сургууль, Соёл урлагийн их сургууль (СУИС-РТМУС), Отгонтэнгэр их сургууль, Сити их сургууль, Хэвлэлийн хүрээлэн зэрэг сэтгүүлч бэлтгэдэг томоохон 7 их, дээд сургууль, коллежид нэвтрүүлээд байгаа аж.