Ардчилсан намын Улс төрийн зөвлөл өчигдөр /2024.07.05/ орой хуралдаж, МАН-тай хамтарч Засгийн газар байгуулах болсон талаар мэдээлсэн. Энэ талаар УИХ-ын гишүүн Н.Алтанхуягаас тодруулж байна.

Тэрбээр, парламентын ёс жаяг гэж бий. УИХ-ын сонгуулиар олонх хэн болох вэ? гэдгийг үздэг. Аль нэг тал олонх болсон бол Засгийн газраа дангаар байгуулаад явах боломжтой. Янз бүрийн асуудлаас болж хамтрах тохиолдол гардаг. Жишээлбэл, 2008 онд МАН олонх болсон ч үймээн гарч, таван хүний амь үрэгдэж, нөхцөл байдалтай холбоотойгоор улс орны эрх ашгийн төлөө хамтарч ажиллах саналыг АН-д тавьж байсан түүхтэй. Одоо хамтарсан Засгийн газар байгуулахаар болсныг хоёр үндэслэлтэй гэж харж байна. Нэгдүгээрт, улс төрийн тогтворгүй байдалтай холбоотой, хууль зүйн хувьд олонх болсон учраас үндэслэлтэй. Хоёрдугаарт, сонгуулиас хойш хамтарсан засаг гэж ярьж байгаа ч бичиг нь ирээгүй. АН-д бичиг ирсэн бол бүх гишүүдэд тэрхүү бичиг нь хүртээлтэй байх ёстой. Тэр бичгийг би үзээгүй, мэдээгүй. Хэрэв хамтарсан засаг байгуулах гэж байгаа бол ном журмын дагуу байх ёстой.

Намд ирсэн бичиг намын даргын өмч биш. Мордохын хазаа болгохгүйн тулд гишүүддээ танилцуулах ёстой.

Олон нийтээс нуух шаардлагагүй. Бүгд хамтарсан Засгийн газар байгуулах болсон учир шалтгааны талаар ойлголттой болсны дараа намынхаа удирдах зөвлөлөөр хэлэлцэх нь зөв. Гэхдээ МАН олонх болчихсон байж яагаад хамтрах гээд байгаа талаар мэдээллийн би авахыг хүсч байна.

АН одоо бол хяналтын үүргээ маш сайн гүйцэтгэж чадах тоонд хүрсэн. УИХ-ын 42 гишүүн АН-аас сонгогдсон. Хуучин бол 11-13 гишүүн төлөөлж байсан. Бид хяналтын сонсгол, түр хороо байгуулах гэхээр ирц хүрдэггүй. Одоо бол хангалттай ирцтэй болсон. Тэгэхээр хүчтэй сөрөг хүчин байх боломжтой.