Баянгол сумын Гонир багийн малчин Б.Балжинням Сэлэнгэ аймгаас тодорсон 2 дахь “Улсын Хошой аварга малчин”-аар шалгарлаа.
34 жил тасралтгүй малчин хийж буй тэрбээр Монгол Улсын Засгийн газраас мал аж ахуйн талаар баримталж буй бодлого шийдвэрийг өөрийн мал маллах арга ухаантай хослуулан, малын үүлдэр угсаагаа жил бүр тогтмол сайжруулан, нэг малаас авах ашиг шимээ нэмэгдүүлэн ажиллаж хонин сүрэг нь цэвэр Баяд үүлдэр, үхэр сүрэг нь Хар тарлан, Казакийн цагаан толгойт, Талын улаан үүлдрээр өсгөж байна.

2018 онд Улсын “Аварга малчин”-аар шалгарсан бол ийнхүү 6 жилийн дараа “Улсын хошой аварга малчин”-аар шалгарсан байна. Буянт мал сүргээ өсгөн үржүүлж, хөдөө аж ахуйн бүтээгдэхүүний үйлдвэрлэлд хувь нэмрээ оруулж буй та бүхэндээ сайн, сайхныг хүсэн ерөөе.

ТҮҮХТ 30 ЖИЛИЙН ОЙН ЖИЛДЭЭ “УЛСЫН АВАРГА ТАРИАЛАНЧ ХАМТ ОЛОН”-ООР ШАЛГАРЧЭЭ

Сэлэнгэ аймгийн Баянгол сумын “Баян шинэ зам” ХХК нь 1994 онд Баруунхараа сангийн аж ахуйгаас үүсгэн байгуулагдсан “Дэвшилт”, “Өрнөлт” хоёр компанийг нэгтгэн зохион байгуулах замаар үүсгэн байгуулагджээ.

Байгаль цаг уурын дулаарал, өөрчлөлтийн нөхцөлд дасан зохицсон газар тариалангийн үйлдвэрлэл эрхэлж тогтвортой ургац авч өндөр үр ашигтай ажиллахыг зорьж, үүсгэн байгуулагдсан цагаасаа тасралтгүй үйл ажиллагаа явуулж зохих үр дүнд хүрч байна. 2023 онд улаанбуудай 665 га талбайгаас 1208 тн хураан авсан байна.

Сонирхуулахад тус компанийн Ерөнхий захирал Г.Нямсамбуу ах маань үндсэн мэргэжил нь малын эмч мэргэжилтэй ч, хөдөө аж ахуйн салбартай өөрийн ажил амьдралаа бүрэн холбож ийнхүү газар тариалангийн салбарт ч мөн амжилттай хөдөлмөрлөж байна.

Та бүхний маань ургац арвин байж, түмэн олноо хүнсээр хангах үйлс нь үргэлж өөдлөн дэвжих болтугай.