Мэргэжлийн боловсролын салбарын олимп гэж нэрлэгддэг дэлхийн ур чадварын тэмцээнийг 1950 оноос эхлэн зохион байгуулах болсон.

Энэ уралдаанд дэлхийн 86 орон оролцдог болж өргөжжээ. Манай улсын хувьд 2015 оноос хойш тогтмол оролцож амжилтуудаа 3-5 байр ахиулсаар байна. Гагнуурын төрөлд дэлхийн рекорд эзэмшдэг билээ.

Дэлхийн ур чадварын тэмцээнд эх орноо төлөөлөх оролцогчдыг сонгохын тулд "Монгол ур чадвар" тэмцээнийг жил бүр зохион байгуулдаг. Энэ жил гагнуур, мужаан, өрлөг, цахилгаан, тогооч, токарь зэрэг төрөлд төрийн болон хувийн сургуулийн багш оюутнууд, Завхан, Ховд, Дорнод аймаг болон Налайх дүүргийн мэргэжлийн болон техникийн сургуулийн багш оюутнууд шалгарчээ.

 Шанхайд болох байсан энэ оны дэлхийн ур чадварын уралдаан цар тахлын улмаас цуцлагдсан. Тиймээс өөр зохион байгуулалтад орж төрөл тус бүрээр нь улс орнууд явуулахаар болсон байна. Манай үндэсний шилдгүүд 06-дугаар сарын 18-ны өдөр Солонгос улсыг зорилоо.

Дэлхийн ур чадварын тэмцээнд оролцон уралдаад өнгөрөх биш тэндээс технологи судлах, олон улсын жишиг, стандартыг өөрийн орны мэргэжлийн боловсролын салбарт нутагшуулах зэрэгт эксперт багш нарыг түлхүү анхаарахыг БШУ-ы сайд чиглэл болголоо.

Олон улсаас судалсан туршлагадаа тулгуурлан энэ салбарт бопдлого боловсруулах, хөтөлбөрийг шинэчлэн сайжруулах зэрэгт оролцоотой ажиллахыг уриалсан юм.