Энэ долоо хоногт УИХ, Байнгын хорооны хуралдаанаар хэлэлцэх хуулийн төслүүдийн талаар УИХ-ын гишүүн Ц.Даваасүрэн, С.Ганбаатар нар сэтгүүлчдэд мэдээлэл хийлээ.

Засгийн газраас өргөн мэдүүлсэн Монгол Улсын2014 оны төсвийн гүйцэтгэл батлах тухай УИХ-ын тогтоолын төсөлд УИХ нухацтай хандах ёстойгэж УИХ-ын гишүүн Ц.Даваасүрэн хэллээ.

УИХ-ын сонгууль болоход нэг жил үлдсэн учраас 2012 онд амласан амлалтуудаас юу нь хэрэгжсэн, юу нь хэрэгжээгүй вэ гэдгээ нухацтай хэлэлцэх. Тэр дундаа өнгөрсөн жил төсвийн орлого 1.6 их наяд төгрөгөөр тасарсан шалтгааныг судлах, орлого төвлөрөхөд юу саад болов, хүнд хэцүү үед ямар компани татвараа төлсөн, ямар компани төлөөгүй вэ гэдгийг УИХ-ын төвшинд сайн ярих хэрэгтэй.

Мөн банкны системийн хэмжээнд хугацаа хэтэрсэн зээлийн хэмжээ 754 тэрбум төгрөгт хүрсэн нь 2013 оныхтой харьцуулахад 4-5 дахин өссөн үзүүлэлт байна. Тодруулбал, 2013 онд банкны хугацаа хэтэрсэн зээлийн хэмжээ 180 тэрбум төгрөгтэй тэнцэж байсан бол 2014 онд 754 тэрбум төгрөгт хүрчээ.

Зээл цаг хугацаандаа төлөгдөхгүй болоход нөлөөлсөн нэг гол хүчин зүйл нь хувийн хэвшлүүд банкнаас зээл авч, улсын ажлыг хийсэн. Харин төр цаг хугацаандаа багтаж хувийн хэвшлүүдээр хийлгэсэн ажлынхаа хөлсийг өгч чадаагүй нь банкны хэмжээнд хугацаа хэтэрсэн зээлийн хэмжээ өсөхөд нөлөөлсөн байх талтай хэмээн УИХ-ын гишүүн Ц.Даваасүрэн ярилаа.

Мөн Эрүүгийн хуулийг нухацтай хэлэлцэх ёстой. Нийгэм, эдийн засгийн өөрчлөлттэй холбоотойгоор хуулийн төсөлд шинэ сайн заалтууд тусгасан ч зарим заалт учир дутагдалтай гэнэ. Тухайлбал, уг төсөлд улстөрчийн биед хүрвэл 5-12 хүртэл жилээр ял өгөхөөр заасан нь эрх мэдэл бүхий хүмүүсийн эрх ашгийг хамгаалахад чиглэж байна гэлээ.