Монгол Улсын Ерөнхийлөгчийн зарлигаар Монголын хүүхдийн эрүүл мэнд, боловсрол, халамж хамгаалал, хууль, эрх зүйн нөхцөл байдлыг сайжруулахад оруулсан хувь нэмэр, хичээл зүтгэлийг нь өндрөөр үнэлж Монгол Улс дахь НҮБ-ын Хүүхдийн сангийн суурин төлөөлөгч Мохамед Малик Фоллыг “Найрамдал” медалиар шагналаа.

“Найрамдал” медалийг Монгол Улсын Ерөнхийлөгчийн Тамгын газрын дарга П.Цагаан өнөөдөр Төрийн ордонд гардуулан өгөв.

Шагнал гардуулах ёслолын үеэр Ерөнхийлөгчийн Тамгын газрын дарга П.Цагаан хэлсэн үгэндээ “Монгол Улсын Ерөнхийлөгчийн зарлигаар энэхүү медалиар таны монгол хүүхдүүдийн эрүүл мэнд, боловсрол, халамж хамгаалал, хууль, эрх зүйн нөхцөл байдлыг сайжруулахад оруулсан хувь нэмрийг үнэлж шагнаж байна.

Мохамед Малик Фолл та Монголд олон жил ажиллаад өөр оронд томилогдон явах гэж байна. Танд Монголын олон мянган хүүхэд, тэдний аав, ээжийн өмнөөс баярлалаа гэж хэлье. Шинээр томилогдсон газартаа өндөр амжилт гаргахыг хүсэн ерөөе” гэлээ.