Үнэт цаасны зах зээлийн багц хуулийн төсөл өргөн барилаа
УИХ-ын гишүүн, Эдийн засгийн хөгжлийн сайд Н.Батбаяр Үнэт цаасны зах зээлийн тухай хуулийн шинэчилсэн найруулгын төслийг УИХ-ын дарга З.Энхболдод өргөн барилаа.
2013.01.08

Үнэт цаасны зах зээлийн багц хуулийн төсөл өргөн барилаа

Үнэт цаасны тухай хуулийг 1996 онд баталж, 2002 онд шинэчлэн найруулж Үнэт цаасны зах зээлийн тухай хуулийг батлаж байсан. Сүүлийн жилүүдэд хөрөнгийн зах зээлд шинээр хувьцаа гаргах /IPO/ замаар олон нийтээс хөрөнгө татах явдал нэмэгдсэнтэй холбоотойгоор зах зээлийн хэмжээ өсч байна. Хөрөнгийн зах зээлийн үнэлгээ 2009 оны эцэст 620.7 тэрбум төгрөг байсан бол 2010 оны эцэст 1329.9 тэрбум болсон.

Харин 2011 оны 2 дугаар сард 3219.2 тэрбум, 2011оны 11 дүгээр сарын байдлаар 2100.7 тэрбум төгрөгийн хэмжээтэй байна.

Түүнчлэн компаниуд хувьцаагаа давхар бүртгэлтэйгээр дотоод болон гадаадын зах зээлд гаргах эрэлт, хэрэгцээ нэмэгдэж байгаа ч үнэт цаасны давхар бүртгэлийн асуудал одоогийн хууль тогтоомжийн хүрээнд зохицуулалтгүй байгаа нь уг хуулийн төслийг боловсруулах шаардлага үүсгэсэн гэдгийг хуулийн төсөл санаачлагч хэлж байгаа аж.

Энэ хуулийн төслөөр Үнэт цаасны зах зээлд оролцох, үйлчилгээ үзүүлэх мэргэжлийн байгууллагын төрөл, бүртгэлийн үндсэн дээр эрхлэх үйл ажиллагаа, тавигдах нөхцөл, шаардлагыг шинээр тогтоож, нарийвчилсан дүрэм журмаар зохицуулахаар заасан байна. Мөн Төрийн эрх бүхий байгууллага үнэт цаасны зах зээл дэх бүрэн эрх, хууль тогтоомжийг хэрэгжүүлэх арга хэмжээний төрөл, хэлбэр, ялгааг заахаас гадна өөрийгөө зохицуулах байгууллагын эрх зүйн байдлыг тодорхойлж, тэдгээрийн бүрэн эрх, гишүүнчлэлийн асуудал  зэргийг тусгажээ.