Өнгөрөгч Баасан гарагт /2025.05.23/ болсон НИТХ-ын ээлжит бус VI хуралдаанаар “Уламжлалт анагаах ухааны Элэг судлалын клиник төвийг Сонгинохайрхан нэгдсэн эмнэлгийн салбар эмнэлэг болгох” асуудлыг хэлэлцэж баталлаа.

Саяхан НЗД-ын дэргэдэх "Уламжлалт анагаах ухааны элэг судлалын клиник төв"-ийг нийслэлийн Өмч хувьчлах комисс хуралдаж, менежментийн гэрээгээр ажиллуулах 73 дугаар тогтоолыг хүчингүй болгож, нийслэлийн өмчид буцаан авсан билээ. Учир нь тус эмнэлэг нь батлагдсан төсвийг зориулалтаар нь ашигладаггүй, санхүүгийн тайлангаа өгдөггүй, цалингийн 205 сая, НДШ-ийн 910 сая, татварын 507 сая, эм оношлуурын 575 сая, хүнсний 555 сая, газрын төлбөрт 48 сая төгрөгийн өр төлбөртэй болох нь тогтоогджээ. Энэ үеэр уг төвийг шинэчлэн салбар эмнэлгийн үйл ажиллагааг өргөжүүлэх талаар мэдээлсэн. Тэгвэл тус эмнэлгийг Сонгинохайрхан нэгдсэн эмнэлгийн салбар эмнэлэг болгон 130 ортой, 12 төрлийн кабинет, хүүхэд, дотор, элэг судлалын чиглэлээр эмнэлгийн тусламж, үйлчилгээ үзүүлэхээр төлөвлөжээ.

Хэлэлцэж буй асуудалтай холбогдуулан ИТХ-ын гишүүд үг хэлж, асуулт асуулаа.

НИТХ-ын төлөөлөгч З.Төмөртөмөө:

Би байнга хэлдэг. Хамгийн улстөржүүлж болохгүй, хамгийн чухал салбар бол Эрүүл мэнд гэж. Нийслэлийн ЭМГ-ын дарга, удирдлагууд солигдох тутам дүүргийн ЭМТ-үүд, эмнэлгийн дарга нарыг солио холио хийдэг тохиолдлууд сүүлийн жилүүдэд нэлээдгүй гарлаа. Жишээлбэл, Чингэлтэй дүүрэг сүүлийн 3-4 жилийн хугацаанд хэдэн даргатай болов оо. Сүүлд нэг хүн ирчихээд тамгаа авч зугтаагаад өөрөө эмнэлэгт хэвтээд нэг хэсэг нэг хэсэг алга болж, удирдлагагүй болсон. Дүүргийн ЭМТ, эмнэлгийн дарга нарыг тогтвортой ажиллуулж болохгүй юмуу? Одоо шинэ дарга ирчихсэн гээд солих уу? Чингэлтэй дүүргийн тухайд та бүхэнд ямар бодлого байна вэ? Өөрийнхөө хүн амьтныг тавина гээд дайрчих юм биш биз. Эрүүл мэндийн ажилчидтай уулзахаар их л хүнд зүйлсийг ярих юм. Хаа хамаагүй нэг нөхөр авчраад тавина. Тэр нь би тэрний хүн гээд улстөрждөг. Ажлаа хийгээд явж байгаа, цалин мөнгө багатай ч энхийн манаанд өдөр шөнөгүй зогсож байдаг, эрүүл мэндийн эмч, эмнэлгийн ажилчдаар бага тогломоор байна аа. Сэтгэл зүйгээр нь тайван амгалан ажлыг нь хийлгэмээр байна.