УИХ-ын чуулганы /2025.04.04/-ны өдрийн хуралдаанаар Эрүүгийн хэрэг хянан шийдвэрлэх тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүдийн хэлэлцэх эсэхийг хэлэлцлээ.

Хэлэлцэж буй асуудалтай холбогдуулан гишүүд асуулт асуулаа.

УИХ-ын гишүүн С.Эрдэнэболд: 

Нэгдүгээрт, Хүний эрхийн багц хуулиуд орж ирж байна. Хоёрдугаарт, Хууль зүйн яамнаас санаачлаад Хүний эрхийн Үндэсний 2 дугаар хөтөлбөр батлагдана гэж тооцож байгаа. 2004 оноос хойш гэхээр бараг 20 жилийн дараа энэ асуудал яригдаж байгаа. Гуравдугаарт нь ойрын үед буюу энэ жилийн хавар юм уу намрын чуулганаар үндэсний аюулгүй байдлын үзэл баримтлал шинэчлэн батлагдах хийгээд түүнд хүний эрхтэй холбоотой асуудлууд орох юм байна хэмээн ойлгож байгаа. Дөрөвдүгээрт нь Улаанбаатарын 2040 дунд хугацааны бодлогын бичиг баримт болон бусад зүйлүүд дээр хүний эрхийн асуудлууд нэлээн тавигдаж байгаа. Сая утааны асуудал ч гэсэн үүнтэй холбоотой болсон.УИХ бас хүн төвтэй байх 5 тулгуурт стратеги батлаад явж байгаа. Энэ стратегийн хүрээнд УИХ-аас гарч байгаа бүх шийдвэрүүд хууль тогтоомж дээр энэ хүний эрхийн мэдрэмжтэй байх шалгууруудыг гаргаж байгаа. Тэгэхээр энэ өргөн барьж байгаа хуулийн төсөл дээр хүний эрхийн нөхцөл байдлыг сайжруулах, зөрчигдсөн эрхийг сэргээх, одоо үүсээд байгаа нөхцөл байдал дээр ямар ямар хамгаалалтууд нэмэгдэж байгаа вэ? энэ тал дээр тодорхой мэдээллүүдийг өгнө үү?

Түүний асуултад, УИХ-ын гишүүн, ХЗДХ-ийн сайд О.Алтангэрэл хариуллаа