2025.04.03
С.Эрдэнэболд: Утааны асуудлын ард мөнгө угаалт явагддаг байж болзошгүй тул АТГ анхаарч ажиллах ёстой!
УИХ-ын чуулганы /2025.04.03/-ны өдрийн хуралдаанаар Монгол Улсын Ерөнхий сайдаас Улсын Их Хуралд ирүүлсэн Авлигатай тэмцэх газрын дарга З.Дашдавааг улируулан томилуулах тухай саналыг хэлэлцлээ.
Хэлэлцэж буй асуудалтай холбогдуулан гишүүд асуулт асууж, байр сууриа илэрхийллээ.
УИХ-ын гишүүн С.Эрдэнэболд:
Авлигыг дотор нь 2 ангилж байгаа. Онолын дагуу, махан тэжээлтэн буюу өвсөн тэжээлтэн гэж. Инээж байгаа хүмүүс ном дээрээс уншиж болно. Онолын ном дээрээ томоохон албан тушаалтан, их хэмжээний авлигын асуудал бий болгохыг махан тэжээлтэн гэж буй. Өвсөн тэжээлтэн гэдэг нь бага, дунд албан тушаалтнуудын жижгээр авлигыг бий болгож буйг хэлж байгаа. Иргэдийн зүгээс "махан тэжээлтэй авлигын сүлжээг устгах" тал дээр учир дутагдалтай байна гэсэн шүүмжлэл байна.
Нэгдүгээрт, Ерөнхий сайд таны нэрийг оруулж ирж байгаа юм байна. Таны АТГ-ыг цаашид үргэлжлүүлэн удирдах концепц, хувь хүний итгэл үнэмшил чинь юу юм бэ? АТГ-ыг үргэлжлүүлэн удирдах, амжилтад хүргэх, авлигыг бууруулах, эрх зүйт нийгмийг төлөвшүүлэх хүний эрх, эрх чөлөөг илүү хангах, нийгмийн хорт хавдар болсон үзэгдлийг бодитойгоор бууруулах хувь хүний чинь итгэл үнэмшил юу байна?
Хоёрдугаарт, Итгэл үнэмшлийг хэрэгжүүлэх концепц юу байна. Өмнөх уулзалтуудаар авлигыг бууруулахад ОУБ-аас ирүүлсэн зөвлөмжүүдийг та хэлж байсан. Үүн дээр УИХ-ын чуулган дээр нэгэнт протокол үлдэж байгаа. Тиймээс та тодорхой хэмжих нэгжтэй, хэмжиж болохуйц концепцыг хэлнэ үү?
Гуравдугаарт, Өнгөрсөн 10 орчим жилийн хугацаанд 1,8 их наяд төгрөгийн зардлыг утааг бууруулах зорилгоор зарцуулсан. Гэвч 190 гаран тэрбум төгрөгийн хэрэг зөрчил одоогийн байдлаар мэдэгдээд байна. Утааны асуудал гэдгийг цаг зуурын шинж чанартай улирлын зовлон гэж ойлгож болохгүй. Хүний эрхийг ноцтойгоор зөрчсөн Монгол Улсын иргэний амьд явах эрүүл аюулгүй орчинд амьдрах эрхэд ноцтойгоор заналхийлж байгаа зүйл. Үүнийг зоригтойгоор далайцтайгаар шийдэж чадахгүй байгаагийн нэг нууц нь мөнгө угаалт явагддаг байж болзошгүй нөхцөл байдал дээрээс нь янз бүрийн төсөл хөтөлбөрөөр далимдуулж татвар төлөгчдийн мөнгийг шамшигдуулдаг байж болзошгүй нөхцөл байдлууд байгаа юм. Энэ нь Монгол Улсын хүн амын талаас илүү хувь нь оршин амьдарч байгаа Улаанбаатар болон суурьшмал хотуудад тохиолдож байгаа асар том үндэсний аюулгүй байдлын гамшиг. Түрүүний хэлдэг махан тэжээлтэй авлигын сүлжээний маш том хэлбэр нь нэг талаасаа уур уурхайтай холбоотой байгаа ч нөгөө талаасаа энэ нь утаатай холбоотой!
Түүний асуултад, Авлигатай тэмцэх газрын дарга З.Дашдаваа хариуллаа.

Сэтгүүлч
Сэтгүүлч Б.Хонгорсайхан