УИХ-ын чуулганы /2025.03.31/-ний өдрийн хуралдаанаар  Засгын газрын 2024-2028 оны үйл ажиллагааны хөтөлбөрийн 2024 оны гүйцэтгэлийн тайланг хэлэлцэж байна.

Хэлэлцэж буй асуудлуудтай холбоотой гишүүд асуулт асуулаа.

УИХ-ын гишүүн П.Сайнзориг

ЗГ-ын үйл ажиллагааны хөтөлбөрт гарч буй алдаа дутагдлаа зөв дүгнэж чадвал ажлууд урагшилна. Төсвийн гүйцэтгэл энэ зарчмаар явах нь зүйтэй. Гэтэл бид гүйцэтгэлийг сонсохдоо хуумгай ханддаг. Төсвийн гүйцэтгэлийг нягт сонсож байж ирэх жилийн төсвөө зөв гаргах боломжтой. Тайлагнах үйл явцад хөнгөн хуумгай хандаж ирснээр хариуцлага хүлээхээс зайлсхийдэг жишиг тогтсон. Өөрсдөө ч ойлгохгүй аргачлал ярих бус иргэдэд ойлгомжтой тоон чанараар ярьдаг баймаар байна. Төр тайлангаа тодорхой, тоон үзүүлэлтээр гаргаж чадахгүй, хурал зөвлөгөөн, чуулган хийлээ гэх мэт дүгнэх боломжгүй байдлаар хийдэг. Тайлагнадаг үйл явцыг тал талын институциуд хийдэг биш зөв болгох хэрэгтэй. Өмнө нь тайланг ЗГ-ын ХЭГ-ын даргаас асуудаг байсан бол одоо хариулж мэдэхгүй, өөр яамтай гээд сууж байна. Эдийн засаг, Хөгжлийн Яам бэхжих гээд ажиллаж байх шиг байна. ХЭГ-ын дарга, ЭЗХ-ийн сайдын ажил үүргийн чиглэлээ тодорхойлж, цэглэх шаардлагатай.

ЗГ-ийн үйл ажиллагааны хөтөлбөрт байгаа бүх зүйл хийгдэж амжихгүй. Тиймээс салбар салбарын чухал, гол ажлуудаа онцгой эрчимжүүлэх тал дээр сайд нар анхаараачээ. Тухайлбал, уул уурхайн эдийн засагтай орны хувьд энэ чиглэлийн бодлого хаана байна вэ? Баялгын сангийн асуудал хөндөгдөхөд цөөн хэдэн компани л дурдагдах юм. Бусад стратегийн ордууд хэр идэвхжиж байна вэ? Хэлэлцээр хийх гээд байна уу? Бэт гээд нөхөр сайдаасаа давж жагсаал хийнэ гэнэ. Аль сайд хариуцаж байна вэ? Мөн "Ногоон эдийн засаг"-ийг моодны үг болгон хэрэглээд байна. Хэзээ тодорхой зорилго, зохицуулалттай төрийн бодлого гарч ирэх вэ? Бодлогын бичиг баримт дээр тусгагдсан ч бодлогоо дэмжсэн үйл ажиллагаа алга. Цэвэр эрчим хүчний асуудлын хувьд газрын дулааныг шийдэж чадвал аймгуудын агаарын бохирдол шийдэгдэнэ. Хөрөнгө оруулалт татъя гэхээр газрын дулааныг ашиглах хууль эрх зүйн орчин байхгүй. 

Түүний асуултад ЗГХЭГ-ын дарга Н.Учрал хариуллаа.