Хятад Монголын худалдааны 6 дугаар экспо БНХАУ-ын Шанхай хотноо боллоо. Тус экспод Элчин сайд Т.Бадрал, Боомтын сайд Б.Тулга, УИХ-ын гишүүн Т.Энхтүвшин, Дорноговь аймгийн Засаг дарга О.Батжаргал нарын хамт оролцож, ӨМӨЗО-ны Гаалийн газар, Худалдааны яам, Эрээн хотын Гааль, Засаг захиргааны удирдлагуудтай хамтын ажиллагааны уулзалтыг зохион байгууллаа.

Монгол Улсын Ерөнхий сайд Л.Оюун-Эрдэнэ БНХАУ-ын Ерөнхий сайдтай энэ оны 10 дугаар сард Киргиз улсад хийсэн уулзалтаар Эрээн Хот Замын-Үүд чиглэлийн зорчигч авто тээврийн хэрэгслийг нэвтрүүлэх талаар санал тавьсан билээ. Уг хүсэлтийн дагуу Эрээн Замын-Үүдийн хооронд зорчигчийг тээвэрлэх жижиг оврын суудлын авто тээврийг туршилтын журмаар эхлүүлэхээр тохиролцлоо. Мөн хил орчмын аялал жуулчдыг 12 дугаар сараас эхлэн явуулахаар тохиролцон гэрээнд гарын үсэг зурлаа.