Сонгинохайрхан дүүргийн 21 дүгээр хороо 61 гарам орчимд өчигдөр түр зуурын аадар бороо орсны улмаас 20 гаруй айлын хашаанд ус орж, 2 айлын гэр, 10 хашаа, саравч, явган хүний гүүр нурсан.

Тухайн газарт дүүргийн удирдлагууд, аврах анги, Сонгинохайрхан дүүргийн Онцгой байдлын хэлтсийн алба хаагчид шуурхай ажиллаж, үерийн усанд боогдсон 4 том хүн, 3 хүүхдийг зөөвөрлөн аюулгүй газарт байрлуулж ажиллалаа.

Мөн үерийн усанд автсан хоёр айлыг нүүлгэн шилжүүлж, нийтийн эдэлбэр газар, автозамруу урсан орсон өвс, хашаа, хайс, лаг шаврыг ТҮК ОНӨААТГ, Улаанбаатар шинэчлэл ХХК-ийн 20 гаруй ажилчид цэвэрлэн хогийн төвлөрсөн цэг рүү зөөвөрлөн ажилласан байна.

Үерт автсан хэсгийн бохирдсон талбайг ковш трактор, экскэ механизмуудаар хусаж, хөрсний ариутгал , халдваргүйтгэлийн ажлыг хийж цэвэрлэнэ.

Тухайн нөхцөл байдал дээр аврах ангийн авто машин, завь, 2 задгай тэвштэй автомашин, 1 ковш авто машинтай нийт 40 гаруй хүний бүрэлдэхүүнтэй баг ажиллалаа.