УИХ-ын гишүүн Г.Амартүвшин:

Өвдсөн, халдвар авсан иргэд маш их бухимдалтай байна. Эм олдохгүй, эмнэлгийн орны хомсдолд орсон байна. Одоогийн байдлаар 13 мянган иргэн эмнэлэгт, 22 мянга нь гэрийн хяналтад байгаа гэдэг мэдээлэл байна. Манай улсын орны нөөц хэр байгаа вэ. Хэрэв энэ хууль батлагдвал эм, эмчилгээ, орны асуудал шийдэгдэх үү. Мөн амьсгалын аппарат хүрэлцээгүй байна гэж байгаа. Үүнд мэдээлэл өгөөч.

Эрүүл мэндийн салбарт ажиллагсдын хүний нөөцийг богино хугацаанд нэмэгдүүлэх боломж бий юу.

Дээрээс нь бид мөнгөгүй болчихоод энэ хуульд өөрчлөлт оруулах гээд байна уу гэдгийг Сангийн сайдаас тодруулъя.

Эрүүл мэндийн сайд С.Энхболд: Улсын хэмжээнд 27 мянган ор байдаг. Үүнд эмнэлэг, рашаан сувилал бүгд багтаж байгаа. Үүнээс 12 мянгыг нь КОВИД-д зориулж байгаа. Орыг мянга мянгаар нь дэлгээр байж болно. Тэнд ажиллах хүний нөөц дутагдалтай байгаа юм. Ялангуяа эрчимт эмчилгээ, яаралтай тусламжийн эмч хомс байдаг. Манайд эрчимт эмчилгээний 340 эмч бий.

Амьсгалын аппарат гурав байгаа, дахин нэгийг худалдаж аваад ирж байгаа. ЭКМО аппаратын нэг хүнд хэрэглэх зардал нь 35 сая төгрөг. Бүх батлагдсан тохиолодлын эм тариаг үнэгүй тарааж өгч байгаа.

Хүний нөөцийн бодлого дээр их сургууль дөнгөж төгссөн, нарийн мэргэжил эзэмшээгүй хүмүүсийг ажиллуулахаар төлөвлөлт хийж байна. Хүний нөөц бэлдэх тийм амархан зүйл биш. Манай улс 13 мянган сувилагч, 11 мянган эмчтэй. Туслах сувилагч, бусад ажилтан гээд нийт 57 мянган эрүүл мэндийн салбарын ажилтантай.

11,500 орон дээр ковидын эмчилгээ үйлчилгээ үзүүлж, цаана нь үндсэн эмчилгээ тусламжаа үзүүлж байна гэхээр эрүүл мэндийн салбарынхан маань үнэхээр туйлдаж байна.

Сангийн сайд Б.Жавхлан: 2021 оны тавдугаар 31-ний байдлаар ЭМД-ийн сангийн зарцуулалт 37 хувьтай байсан. Одоо 495 тэрбум буюу 40 гаруй хувьтай байна. Эрүүл мэндийн салбар төсөвгүй болчихоод нэмж алдагдал гаргах гээд байгаа огт биш шүү.

Байдал хүндэрсэн энэ үед бид энэ сангаа улам илүү хурдтай зарцуулах шаардлагатай байна. Мөнгөгүйдээ биш, байгаа мөнгөө хурдтай зарцуулах хэрэгтэй байна. Эндээс гарсан мөнгө даатгуулагчдын эмчилгээнд л зарцуулагдана.