УИХ-ын нэгдсэн чуулганы өнөөдрийн /2019.01.31/ хуралдаан эхэллээ. Хуралдааны эхэнд хэлэлцэх асуудлын дарааллаа батлах үед УИХ-ын гишүүд санал хэллээ.

УИХ-ын гишүүн Х.Нямбаатар:

"Сонгуулийн тухай хуулийг эртхэн хэлэлцэх асуудлын дараалалдаа оруулж ирэх хэрэгтэй байна. Учир юу вэ гэвэл БЗД 2 тойрог, 2,3 сарын хугацаанд нутгийн өөрөө удирдах байгууллагын төлөөлөлгүй байна. Цагдаагийн эрх бүхий байгууллага, шүүхийн шийдвэрээр 2 тойрогт Сонгуулийн хуулийг зөрчсөн гэж тогтоон, дахин сонгууль явуулах шийдвэр гарсан. 2 ч шүүхийн шийдвэрээр сонгуулийг хойшлуулаад байсан ч сүүлийн шүүх хурлаар сонгууль явуулах шийдвэр гарсан байна.

Гэтэл тодорхойгүй нөхцөл байдал үүссэн гээд гомдол гаргаад улс төрийн хүчний нөлөөлөлтэй маргаан үүсгээд байна. Үүнээс болж БЗД-ийн иргэд бүтэн сонгуулийн нэг цикль тойрон засаг даргагүй, өөрийн төлөөлөлгүй явж байна. Тиймээс нутгийн өөрөө удирдах байгууллагын сонгуулийн тухай хуулийн зохицуулалтыг сайжруулмаар байна.

Шүүхийн 3 шатны шийдвэр гараад, сонгууль явуулах тов нь зарлагдаад байхад БЗД-ийн АН-аас дахин шинэ илэрсэн нөхцөл байдал гэж энэ дүүргийг засаг даргагүй байлгах, сонгууль явуулахгүй байх, шүүхэд нөлөөлөх оролдлого хийсээр байна. Үүн дээр УИХ болон ТББХ анхаарахыг хүсэж байна."