Х.Болорчулуун гишүүн боломжийг ашиглана
УИХ-ын гишүүн Х.Болорчулуун чуулганы завсарлагаанаар тойрогтоо ажиллаж байгаа билээ.
Тойрогтоо гишүүдийн хувьд УИХ-аас батлагдаж гарсан хууль, тогтоомж, шийдвэрүүдийг танилцуулан, сурталчлах их ажлаар хөдөө орон нутгийг зорьдог.
Х.Болорчулуун гишүүний хувьд Дорнод аймагтаа ажиллангаа, өөрийн ажил амьдралын гараагаа эхлүүлсэн Булган сумандаа ч уулзалт зохион байгууллаа. Тэрбээр мэдээж өнгөрсөн хугацаанд хийж гүйцэтгэсэн ажлын тайлангаа тавьсан бөгөөд 40 тонн малын тэжээл, хивэг хандивлаж, гурван оюутны сургалтын төлбөрийг хариуцах болсон тухайгаа дуулгажээ.
Учир нь өнгөрсөн намар Булган сумын малын бэлчээрийн 60 шахам хувь нь хээрийн түймэрт шатаж, олон айл гамшигт өртсөн. Тиймээс мань гишүүн сумын иргэдэд ийн тус болохын зэрэгцээ сумын уугуул хүүхдүүд их, дээд сургуулиа төгсөөд сумандаа тогтвор сууршилтай ажиллах урам болгон төлбөрийн асуудлыг сонгожээ.
Түүнчлэн Жижиг, дунд үйлдвэрлэлийг хөгжүүлэх сангаас 80-100 сая төгрөгийн зээлийн төсөл олгоход дэмжиж ажиллахаа илэрхийлсэн. Өөрөөр хэлбэл парламентад суугаа боломжоо ашиглан эрхэм гишүүн энэ суманд багагүй хөрөнгө оруулалт хийхээр болжээ.
