ХХ зууны эхээр ямар ч байсан Их Британи, Америкт гурван ч том хөлөг онгоц ийм нэртэй байжээ. Герман хэл дээрх нэг эх сурвалжид дурьдсанаар бол бүр дөрөв ч байж. Энэ эх сурвалжид бичсэнийг үзвэл, тэдгээрийн анхныхыг Их Британийн далайн тээврийн хамгийн түүхтэй, хамгийн аварга компанийн нэг “Peninsular and Oriental Steam Navigation” (байгуулагдсанаас нь хойш 200 шахам жилийн дараа буюу 2006 онд Арабын Эмират улс 3.6 тэрбум паундаар худалдаж авсан) 1865 онд захиалж хийлгэжээ. Японд хийсэн Хубилайн довтолгооноос хойш 600 жилийн дараа гадаад их далайд “Монгол” гэдэг нэрийг зүүж гарсан анхных ч байж магадгүй тэр онгоц 1888 онд ашиглалтаас гарсан гэхээс өөр мэдээ баримт олдсонгүй.

Мөнөөхөн “Peninsular and Oriental Steam Navigation” (P&O) компани 1903 онд хийлгэсэн бас нэг онгоцоо мөн л “Монгол” гэж нэрлэсэн байна. 9500 тоннын усан түрцтэй энэ онгоц 1917 онд живсэн гэх мөн л бүдэг бадаг мэдээ байх аж. Хоёр дахь “Монгол” далайд гарсан мөнөөхөн 1903 онд Атлантын далайн нөгөө эрэгт буюу АНУ-ын Нью-Йоркт “New York Ship Building” гэдэг компани 13300 тоннын усан түрц, 1818 хүний багтаамжтай ачаа, зорчигч тээврийн томоохон усан онгоц үйлдэж, нэрийг нь “USS Mongolia” хэмээжээ. Захиалагч нь болох Сан Францискогийн “Pacific Mail Steamship” гэдэг компанийн мэдэлд энэ онгоц анхандаа Сан-Франциско, Хавай, Хятадын хооронд явж байв. Дэлхийн I дайн эхэлсэн 1914 оноос Америкийн “Монгол” Холбоотны цэргийн хүнс, зэр зэвсгийг зөөж Атлантын далайг хөндлөн гулд явах болжээ.

1917 оны гуравдугаар сард Германы арми Атлантын далайн зүүнтээ буюу Их Британийн баруун эрэгт шумбагч онгоцуудаар хориглолт хийн далайн зүгээс Хуучин тив рүү батганын толгой багтах зайгүй болгон холбоотнуудыг сандаргахад “USS Mongolia” онгоцыг 155 мм-ийн гурван их буугаар тоноглож илгээсэн бөгөөд дөрөвдүгээр сарын 19-нд Английн хоолойд тэдгээр буугаараа суман мөндөр буулгаж, өрөмний өт шиг баригддаггүй Германы шумбагчийг устгасан байна. Ингэснээр “Монгол” нь Дэлхийн I дайн эхэлсэнээс хойш задгай далайд америкчуудын хийсэн хамгийн анхны буудлагын эзэн болж түүхэнд алдаршсан юм.

Дайн дуустал цэрэг, зэвсэг зөөж Атлантын далайг олон гаталсан бөгөөд энэ дайнд хамгийн их ажил амжуулсан хөлөг онгоц болж түүхэнд бичигдсэн гэдэг. Панамын сувгаар дамжин тээвэр хийдэг “Panama Pacific Line” компани 1923 онд “Монгол”-ыг худалдан авч Нью-Йорк Сан-Франциско хоёрын хооронд зургаан жил явсан бөгөөд 1929 онд Сан Францискогийн “Dollar Line” компани мөн худалдан авч “President Fillmore” хэмээн нэрийг нь өөрчлөөд дэлхийг тойрсон аялалд хэрэглэж байв. Улмаар 1931 онд “Монгол” герман эзэнтэй Панамын компанийн өмч болж “Panamanian” гэдэг нэртэй байгаад 1946 онд Хонконгод “зодог тайлсан” гэдээг.

1905 онд Нижний Новгород хотод хийсэн "Монгол" байлдааны онгоц. Онгоцны бүхээгийн зүүн биед хуучны славян шрифтээр "МОНГОЛЪ" гэж бичжээ.

1905 онд Нижний Новгород хотод хийсэн "Монгол" байлдааны онгоц. Онгоцны бүхээгийн зүүн биед хуучны славян шрифтээр "МОНГОЛЪ" гэж бичжээ. 

XVIII зууны үед Петр I-ийн элдүүрээр орж, дэлхийн далайн бас нэг их гүрэн болсон Орос орон аль Цагаан хааны үед мөн л “Монгол” гэдэг онгоцтой байв. ОХУ-ын Батлан хамгаалах яамны архивт буй баримтаар бол “Монгол” байлдааны хөнгөн хуягт онгоцыг Нижний Новгород хотын Сормовын заводод 1905 онд үйлджээ. 1908 оноос Хар мөрний усан флотын бүрэлдэхүүнд байсан “Монгол” 1917 онд Зөвлөлтүүдийн талд орж, 1918 онд Хабаровскт япончуудтай тулалдаж байгаад олзлогдон 1920 онд Сахалинд очсон байна.

1925 онд Зөвлөлт улс “Монгол”-ыг эргүүлэн авч Алс Дорнодод “алба хаалгаж” байгаад 1948 онд элдүүрийг нь нэгэнт хангасан хэмээн үзэж, Тэнгисийн цэргийн хүчнээс хасч акталжээ.

54 м урт, 500 морины хүчтэй, багийн бүрэлдэхүүн нь 82 хүнтэй энэ онгоц их бага калибрын есөн буутай, 140 бөмбөг тээх чадалтай байсан байна.

Квантуны армийг бут ниргэхэд идэвхтэй оролцсон боловч гавьяа шагнал хүртээгүй хэмээн зарим эх сурвалжид тэмдэглэсэн бий. Цагаан хаан Орос-Японы дайнд ялагдсаныхаа дараа Хар мөрний флотыг зэвсэглэхэд онцгой анхаарч,  Нижний Новгородын үйлдвэрт байлдааны хөнгөн онгоц нэлээдийг хийлгэсэн нь ихэвчлэн “Хар салхи”, “Мөндөр”, “Аадар”, “Шуурга” эсвэл “Жад”, “Сэлэм”, ”Буу”, ”Сум” гэхчлэнгийн нэртэй байсны дунд “Буриад”, “Халимаг” гэх мэт, маньтай хамаатай юм уу гэмээр нэртэй хэдэн онгоц байсны нэг нь энэ “Монгол” билээ. Харин 1917 оноос хойш хийгдсэн онгоцууд “Карл Маркс”, “Улаан туг” гэх мэтийн нэрээр гарсан нь зүй ёсны хэрэг биз.  

  Дашрамд сонирхуулахад, хуучин Зөвлөлтөд “Улаанбаатар” гэдэг нэртэй ачааны хөлөг онгоц байсан. Архангельскийн далайн тээврийн флотын энэ онгоцыг 1956 онд бүтээж 80-аад оны сүүл хүртэл агнуурын загас тээвэрлэж байсан байдаг. Гэхдээ энэ үе нь, тэдний манай хоёр ах дүүгийн ган бат найрамдалтай, “ижил үйлстэн”-гүүд байсан үе тул тэгтлээ гайхахаар зүйл биш. 70-аад онд Москвагийн нэгэн кино театрыг “Улан-Батор” хэмээн нэрлэж ган бат найрамдлаа мөнхжүүлж байсантай ялгаагүй зүйл юм. Москвагийн хамгийн хуучирсан (хуучин биш шүү!) кино үзвэрийн газрын нэг болж үлдсэн энэ театр одоо энэ нэрээрээ л Х.Гримаугийн гудамж-12-т, гудамжных нь нэрийн уг эзэн болох 30-аад оны Испанийн коммунисттай нэгэн адил мартагдсан шиг, хандсан хүнд социализм ханхлуулсан шиг л байж байна.

1903 онд Нью-Йоркт бүтээсэн "USS Mongolia" хөлөг онгоц.

Жюль Вернийн алдарт “Дэлхийг 80 хоногт тойрсон нь” зохиолд “Монгол” хэмээх хөлөг онгоц гардгийг багадаа үзээд хачин гайхаж, бас жигтэйхэн догдолдог, тэр онгоцны нэрийг дахин дахин уншмаар болдог байж билээ. Гол баатар Филеас Фогг нь Италийн Бриндизигээс Сүэцийн сувгаар дайран Энэтхэгийн Бомбэй орохдоо ийм нэртэй, тухайн үеийнхээ хамгийн хурдан онгоцыг хөлөглөдөг. “Монгол” нэртэй онгоцуудын үүх түүхийг түүвэрлэж суухдаа Ж.Верн абугайн “Монгол” ямар учиртайг нягтлахаар уг зохиолыг эргүүлж үзвэл “Аравдугаар сарын есний лхагва гаригийн өглөөний 11 цагт “Peninsular and Oriental” компанийн эзэмшлийн,  таван зуун морины хүчтэй, хоёр мянга найман зуун тонн хүнд ган төмөр онгоц Сүэцийн сувгийн усан буудалд  зогсож байвай” гэж байх нь тэр. “Монгол” хэмээх анхны онгоцны талаар дурьдахдаа герман хэл дээрх нэг эх сурвалжид хэмээн дээр зориуд тэмдэглэсэн маань, холбогдох  баримт сэлт огт үгүйн улмаас тийм онгоц үнэхээр байсан эсэхэд баахан эргэлзсэнийх байв.

Гэтэл Ж.Верн энд уг онгоц хэний эзэмшлийнх болохыг зориуд дурьдсан нь, голоод байсан герман сурвалжид маань буй анхны “Монгол”-ын эзэнтэй таарч байна. P&O. Анхны “Монгол” 1865 онд хийгдсэн гэж тэрхүү сурвалжид бий бол Ж.Верн зохиолоо 1873 онд бичжээ. Тэгэхлээр XIX зууны дунд үеийн Англид “Монгол” хэмээх онгоц үнэхээр байсан, Ж.Верн романдаа Ф.Фоггийн хөлөглөсөн нэг лут унааны нэрийг санаанаас зохиогоогүй, үүнийг бичигч олж үзсэн зүйлээ “нэг муу герман сурвалж” хэмээн голох хэрэггүй байсан бололтой. Нэг үгээс түмэн утга цацарна гэж дээдэс яасан үнэн хэлээ вэ.
Жич: Агаарын бөмбөлгийг зохиосон ах дүү хоёр францыг Монгольфье гэдэг байсныг багадаа уншиж мэдээд мөн л гайхаж, улмаар үеийн нөхөддөө “Монгол гаралтай нөхдүүд байхгүй юу” хэмээн донгосдог байгаад, дэмий тэнэтэл төөрөлдөж явснаа их л хожуу ойлгосонсон. Одоо үүний учрыг мэдэхгүй хүн үгүй биз гэж бодовч хөгжил дэвшлээс хол хөдөө газар ялангуяа, хүүхэд дүү нар надтай адилаар төөрөлдөх болуужин хэмээн сэрэмжилж бяцхан сэнхрүүлбэл, Montgolfier гэдэг овог нь хоёр үгнээс бүтсэн бөгөөд эхний Mont гэдэг нь уул гэсэн үг.

Тухайлбал бидний сайн мэдэх “Монблан” үзэгний тухайд Montblanc гэж бичдэг бөгөөд франц хэлний тэмдэг нэр, нэр үгийнхээ араас ордог тул өнөө уул маань blanc буюу нь цагаан гэсэн үгтэйгээ нийлээд Цагаан уул гэсэн үг болохыг лавшруулбал энэ нь Альпын нурууны хамгийн өндөр уулын нэр. Montgolfier  буюу Монгольфье гэдэг нэрийн учир бүтцийн хувьд үүнтэй эгээ адилын дээр, унших болон монголоор бичихдээ мөнөөхөн Mont гэдэг үгийн эцсийн гийгүүлэгчийг гээдэг ёсоор  ийм болсон болохоос биш та бидний Монгол гэдэг нэртэй огтоос хамаагүй авай.