УИХ-ын чуулганы /2024.12.12/-ны өдрийн хуралдаанаар Монгол Улсын 2025 оны төсвийн тухай, Нийгмийн даатгалын сангийн 2025 оны төсвийн тухай хуульд өөрчлөлт оруулах тухай, Эрүүл мэндийн даатгалын сангийн 2025 оны төсвийн тухай хуульд өөрчлөлт оруулах тухай хуулийн төслүүдийн эцэслэн баталлаа.

Хэлэлцэж буй асуудалтай холбогдуулан гишүүд асуулт асуулаа.

УИХ-ын гишүүн Х.Тэмүүжин:

Ерөнхийлөгчийн хоригийг хүлээж авсантай холбоотойгоор УИХ төсвийг алдагдалгүй болгох чиглэлээр ажиллалаа. Төсөв алдагдалгүй болохоосоо илүүтэйгээр бас үр ашигтай байх чиглэлээр дараа дараагийн төсөл дээр ажиллаасай гэж хүсэж байгаа. Гэхдээ энэ удаа эцсийн найруулгатай холбоотойгоор хэлэлцүүлэг дээр гарч байсан нэг зүйл дээр үнэхээр үг хэлэхгүй бол болохгүй нь ээ. Монгол Улс парламентын засаглалтай, энэ засаглалынхаа хүрээнд ажиллаж чаддаг гэдгээ харуулахын тулд нэг зүйл хийхээс өөр арга алга. Өдөр бүр ЗГ-ын гишүүд парламентад худлаа хэлдэг болсон байна.

Өчигдөр Жавхлан сайд яг өөдөөс харж байгаад худлаа хэлсэн. УИХ-д гишүүдэд тарааж өгсөн материал дотор Эдийн засгийн хөгжлийн сайд болон Сангийн сайдын эрхлэх асуудлын хүрээнд хөрөнгө оруулалт их засвар гэдэг бичигтэй гүр байгаа. Байсаар байхад ийм зүйл байхгүй ээ гээд л хэлж байгаа юм. Сайдууд. УИХ-д удаа дараа ингэж худлаа хэлж байна. Гэртээ, яаман дээрээ гадуур худлаа хэлдгийг чинь хүмүүс толгойг нь илээд өнгөрөөдөг байж болно. Хууль тогтоох байгууллага дотор орж ирээд худлаа хэлж болохгүй. Парламентын засаглал бүхий улс орнуудад парламентыг үл хүндэтгэх гэдэг гээд гэмт хэрэг байгаа. Парламент дуудахад төрийн албан хаагч ирэхгүй бол үүнийг гэмт хэрэг гэж үзэж байгаа.

Дуудаад ирэхдээ парламентад тангараг өргөж байж үг хэлж байгаа. Би мэдэх мэдэх ёстой хүрээндээ үнэнийг хэлнэ гэж байгаад энэ тангаргаа зөрчөөд худлаа хэлбэл гэмт хэрэг гэж үзэж байгаа. Одоо парламент ийм хүчтэй хамтарсан Засгийн газар их мөнгөтэй нөөцтэй, ЗГ-ыг хяная гэж бодвол үнэхээр парламентын чуулганд ирээд худлаа ярьдаг үйл ажиллагаа зогсох ёстой. Монгол Улс худлаа ярьдаг,хууран мэхэлдэг өнгөө хууль тогтоох байгууллага дотор хүртэл ингэж өөгшүүлж болохгүй ээ. Тийм учраас дараа дараагийн үйл ажиллагааг цэгцтэй хуулийн хүрээнд явуулахын тулд энэ парламентыг үл хүндэтгэх гэдэг энэ чиглэлээрээ одоо гэмт хэрэг гэж бичдэг юм уу,хариуцлага тооцдог механизмаа бий болгохгүй бол алийн болгон одоо ингэж хууртагдсан худлаа ярьсан үгийнх нь араас сошиалаар хэрүүл хийж сууж байх вэ.