ХӨВСГӨЛ АЙМГИЙН РЕНЧИНЛХҮМБЭ СУМАНД АЖИЛЛАЛАА
Уулзалтаар сумын цаашдын хөгжил болон тулгамдаж буй асуудлаар санал солилцож холбогдох арга хэмжээг авахаар боллоо.
Ренчинлхүмбэ сумын иргэдийн зүгээс 320 хүүхдийн сургуулийн барилгын хөрөнгө оруулалтын асуудлыг шийдвэрлэж богино хугацаанд дуусгах, Соёлын төвийн техник хэрэгслийг шинэчлэх, Ходон багт үүрэн холбооны дахин дамжуулах сүлжээ тавих, төрийн албан хаагчийн цалинг бүсчилж нэмэгдүүлэх, хөдөө орон нутагт амьдрах залуучуудыг бодлогоор дэмжих, хязгаар нутагт өргөн хэрэглээний барааны үнэ өндөр байгаа нь ард иргэдийн амьдралд дарамт учруулж байгаа талаар санал, хүсэлтийг илэрхийлж байв.

Эрүүл мэндийн тусламж үйлчилгээг хөдөө, орон нутагт хүргэх үүднээс УНТЭ-ийн эмч нарын баг давхардсан тоогоор 420 хүнд эрүүл мэндийн үзлэг оношилогоо хийлээ. Түүнчлэн, Ренчинлхүмбэ суманд 150 сая төгрөгийн хөрөнгө оруулалтаар Цахим үйлчилгээний төвийн барилга, 110 сая төгрөгийн хөрөнгө оруулалтаар Цаг уурын өртөөний барилга баригдаж ашиглалтад орсон бол 3,5 тэрбум төгрөгийн хөрөнгө оруулалтаар 320 хүүхдийн сургуулийн барилга баригдаж байна.

ИРГЭДТЭЙ ХИЙХ УУЛЗАЛТ ЦАГААННУУР СУМАНД ҮРГЭЛЖИЛЖ БАЙНА

Уулзалтаар хууль санаачлагчийн хувиар санаачлан батлуулж буй хууль тогтоомж болон төрийн бодлого, шийдвэрийг танилцуулж, иргэдийн санал бодлыг сонслоо. Цагааннуур сумын иргэдийн зүгээс сургуулийн дотуур байрыг өргөтгөх, соёлын төвд шаардлагатай техник, хэрэгслээр хангах, төрийн албан хаагчдын цалинг бүсчилж нэмэх зэрэг асуудлыг тавьж байлаа. Түүнчлэн, Цагааннууранд хар галуу нүүдэллэн ирж загас ихээр хорогдуулж байгаа тул арга хэмжээг авах шаардлагатай байгаа талаар саналыг хэлэв.

Эрүүл мэндийн тусламж үйлчилгээг хөдөө, орон нутагт хүргэх үүднээс УНТЭ-ийн эмч нарын баг давхардсан тоогоор 313 хүнд эрүүл мэндийн үзлэг оношилогоо хийлээ. Мөн төрийн үйлчилгээг иргэдэд хүртээмжтэй болгох зорилгоор Хөвсгөл аймгийн Нийгмийн даатгалын хэлтэс, Хөдөлмөр, халамж үйлчилгээний газар, Улсын бүртгэлийн хэлтэс болон Хөдөөгийн шийдэл компанийн төлөөлөл Цагааннуур суманд ажиллаж, төрийн үйлчилгээг нэг цэгээс хүргэлээ.