УИХ-ын чуулганы /2025.04.03/-ны өдрийн хуралдаанаар Монгол Улсын Ерөнхий сайдаас Улсын Их Хуралд ирүүлсэн Авлигатай тэмцэх газрын дарга З.Дашдавааг улируулан томилуулах тухай саналыг хэлэлцлээ.

Хэлэлцэж буй асуудалтай холбогдуулан гишүүд үг хэллээ.

УИХ-ын гишүүн Б.Мөнхсоёл:

Өчигдөр болсон ХҮН намын зөвлөлөөр энэ асуудал орсон учраас  товчхон ярья. 

Авлига их байх тусам тухайн улсын ЭЗ-ийн өсөлт буурдаг буюу хүний хөгжлийн индекстэй урвуу хамааралтай. Ингэснээр сөрөг үр дагавар үүсч нийгмийг бүхэлд нь хамруулдаг. Авлигын төсөөллийн индекс нь яагаад чухал вэ гэхээр улс төрчдөд итгэх итгэл, төсвийн зарцуулалт, хууль боловсруулж, шийдвэр гаргаж буй үйл явц нь илт тод, иргэдийн оролцоо байна уу... зэрэг олон үзүүлэлт бүхий 13 багц тайлангийн үр дүнд бий учраас. Тэгэхээр АТГ үүнийг судалж иргэд, олон  нийтээс гадна улс төрчдөд мэдээлэл өгөх, мэдлэгжүүлэх замаар урьдчилан сэргийлэх үүргээ биелүүлэх шаардлагатай юм.

Мөн авлигын нөлөөгөөр бид залуусаа гадагшаа алдаж байна. Жижиг зах зээлтэй манай улсад ажлын байр хомс, улс төрд л орохгүй бол ирээдүйгүй гэсэн итгэл үнэмшил бий болсон гэдэг Б.Жаргалан гишүүний үзэл бодолтой санал нэг байна. Зөвхөн бизнесийн салбарт бус төрийн албанд чадвартай боловсон хүчин хомсодсон.

2030 он гэхэд Дэлхий даяараа ядуурлаас ангижирсан байна хэмээн тунхаглаад 160 гаран орон гарын үсгээ зурсан. Гэтэл ядуурлыг бууруулахад сөргөөр нөлөөлж буй гол хүчин зүйл нь авлига болчхоод байна. ОУ-ын түвшинд ДНБ-ий 2 хувь нь авилгийн зориулалттай гэсэн судалгааны үр дүн байгаа ч бодит байдал үүнээс хэд дахин их байх магадлалтай. Манай орны хувьд Азийн сан тэргүүтэй байгууллагууд бизнесийн салбарт авлига хэрхэн нөлөөлж буйг судалж байна.

Танхимд чуулсан гишүүдээ, "Анхны 126"-ийн түүхэнд үлдээж чадах гавьяа нь Авлигыг устгах явдал байх болно. Тиймээс авлигатай тууштай тэмцэхийг уриалж байна.